Kur do të jetë e mundur që artistët dhe televizionet të kenë mundësinë të përfitojnë nga klikimet në YouTube kur ato klikohen në Shqipëri?
Në një mbrëmje në Berlin punonjëset e Acromax, Xhesilda Projka dhe Glanduela Leci përfaqësuan CEO-n e Acromax-it Aldor Nini, dhe morën më shumë informacione rreth statusit të Shqipërisë në procesin e zgjerimit të shteteve në të cilat YouTube do të nisë së shpejti.
Së pari do të nevojitet që sistemi Google për reklamat të njohë gjuhën shqipe, në mënyrë që shërbimet e reklamave të funksionojnë nga territori i Shqipërisë,.
Së dyti duhen krijuar bazat ligjore në mënyrë që Shqipëria të jetë në një linjë me standardet europiane dhe ndërkombëtare, jo vetëm përsa i përket ligjeve që lidhen me të drejtat e autorit por edhe ato të taksave dhe ligjeve të tjera.
Së treti, YouTube duhet të lidhë marrëveshje me agjencitë kolektive në Shqipëri, por ato duhet të kenë aftësitë jo vetëm që të shpërndajnë të ardhurat lidhur me të drejtat e autorit, interpretuesve, etj, por edhe sistemet kompjuterike që të përpunojnë të dhënat nga platformat. Deri sot agjencitë shpërndajnë të ardhurat me Excel.
Së katërti, duhet të jetë vullneti i YouTube që Shqipëria të shtohet në listën e gjatë, nga e cila mundet të hiqen shtete në të cilat YouTube nuk ka më interes të qëndrojë. (Pak e vështirë për ne!)
Përsa i përket disa nga pikave të lartpërmendura, ato janë totalisht në dorën e qeverisë Shqiptare. Këtu përmendim fillimisht funksionimin e agjencive kolektive, të përfaqësuara nga SUADA për mbledhjen e të ardhurave dhe të licensuara nga Ministria e Kulturës për shpërndarjen e tyre.
Deri në marrjen e këtij vendimi, duhet t’i bëjmë të gjithë mirë “detyrat e shtëpisë”, ndërkohë që Acromax do të na mbajë të përditësuar me të rejat e fundit nga Youtube.
Megjithëse nuk është ende e përfshirë në listë, Shqipëria duket se ka miq e dashamirës mes punonjësve të Youtube. Dy prej tyre në Angli, përshëndetën me përzemërsi shqiptarët me shqiponjën tonë dykrenare.
