AKEP ka mbyllur gjithmonë sytë e veshët para shkeljeve të panumërta të dy kompanive të vetme telefonike në Shqipëri, One dhe Vodafone, që abuzojnë pafundësisht me klientët dhe ofrojnë shërbime skandaloze.
Së fundmi, dy kompanitë kanë rritur çmimet për paketat bazë me parapagesë me 100-200 lekë në dy vitet e fundit, por kanë ulur edhe njësitë e përfshira të komunikimit në to, për të nxitur përdoruesit drejt paketave me çmim më të lartë.
Pjesa dërrmuese e qytetarëve janë përdorues të internetit në smartphone, ndaj njësitë që ofrojnë dy paketat e para nuk janë të mjaftueshme për një përdorim optimal mujor, gjë që i detyron t’i drejtohen paketave më të shtrenjta.
Pikërisht reagimi i fundit i drejtorit të AKEP, Tomi Frashëri, për rritjen e çmimeve të paketave nga One dhe Vodafone, duket i dyshimtë në këtë moment. Ai bën thirrje për ulje të tarifave nga 1 Marsi 2024.
Për shkak të neglizhencës së tij të vazhdueshme ndaj të gjitha shkeljeve dhe problematikave, besimi në institucion dhe në zbatimin e masave rregullatore mbetet zero.
Megjithatë, mbetet për t’u parë nëse kësaj here thirrjet e AKEP nuk do të shkojnë në vesh të shurdhër, por do t’i japin përfundimisht zgjidhje mungesën së konkurrencës, tarifave të larta dhe shërbimit problematik të dy kompanive.
