Një ngjarje e rëndë tronditi dje vendin. Një 57-vjeçare e identifikuar me emrin Merushe Gjuzi humbi jetën pasi u vetëhodh nga furgoni me të cilin po udhëtonte në aksin Peqin-Elbasan. Shkak janë bërë mosmarrëveshjet dhe sherret në shtëpi me bashkëshortin Mahmut Gjuzi dhe dhuna psikologjike që ky i fundit i ka shkaktuar prej kohësh 57-vjeçares. Në gjendje të rënduar, Merushja është hedhur nga furgoni me të cilin po udhëtonte drejt Funarit bashkë me miken e saj. Ajo nuk arriti të shpëtonte pasi përplasja ishte fatale.
Policia ka arrestuar sot bashkëshortin e saj. Ndaj 68-vjeçarit, Mahmut Gjuzi, rëndojnë dy akuza “Dhuna në familje” dhe “Shkaktimi i vetëvrasjes”.
Njoftimi i Policisë:
Elbasan Në lidhje me ngjarjen e ndodhur mëngjesin e djeshëm, në aksin rrugor “Peqin-Elbasan”, ku humbi jetën shtetasja M. Gj., 57 vjeçe, si pasojë e vetëhedhjes nga dera e pasme e furgonit për pasagjerë, me të cilin udhëtonte, ju informojmë se: Pas hetimeve të thelluara për rastin, specialistët për Hetimin e Krimeve të Komisariatit të Policisë Elbasan vunë në pranga bashkëshorin e 57-vjeçares, shtetasin M. Gj., 68 vjeç, banues në Rrogozhinë, për veprat penale “Dhuna në familje” dhe “Shkaktimi i vetëvrasjes”. Nëpërmjet dhunës psikologjike të ushtruar ndaj bashkëshortes së tij, 68-vjeçari dyshohet se ka ndikuar te gjendja e rënduar psikologjike e shtetases M. Gj., e cila në këto kushte, është vetëhedhur nga furgoni. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
Si ndodhi ngjarja?
Merushe Gjuzi po udhëtonte me shoqen e saj, teksa në një moment ka hapur derën papritur dhe është hedhur. E pyetur nga policia, gruaja e cila udhëtonte me viktimën ka deklaruar se 57-vjeçarja dukej në gjendje jo të mirë psikologjike në mëngjes pasi siç i kishte thënë shoqes, ishte grindur me bashkëshortin. “Gjithmonë rrinim të ulura në vendin e parë të furgonit”, ka deklaruar shoqja e saj, por këtë mëngjes, Gjuzi deshi të ulej pas dhe u ul vetëm.
