Taulant Seferi ishte ‘shqiponja’ që shkundi dy herë rrjetën e Çekisë mbrëmjen e kaluar, në stadiumin “Air Albania”.
Ai çoi peshë zemrat e shqiptarëve dhe e ngriti stadiumin në këmbë, ndërsa solli gëzim e festë në të gjithë shqiptarinë.
Pas ndeshjes, ai ka folur i emocionuar për fitoren, teksa është shprehur se gjithashtu ka lexuar edhe komentet jo pozitive për të. Ai është në dijeni për faktin që njerëzit nuk besonin tek futbollisti.
“Jam shumë i lumtur për fitoren, ishte fantastike para të gjithë shqiptarëve. Kishte kohë që nuk shënoja për Kombëtaren dhe erdhi në momentin e duhur. E di që shumica nuk ka besuar te unë, por ia shpërbleva trajnerit. Dhe unë jam një njeri i thjeshtë që shoh komentet, nuk kanë besuar te mua. Falenderoj trajnerin, Zotin dhe familjen time, por edhe këta tifozë që na mbështetën.
Unë i kam bërë sot dy gola, padyshim jam i lumtur. Por kur futem në fushë për Kombëtaren, futem për të luftuar për gjithë grupin, për të gjithë shokët e mi. Nuk ka rëndësi kush shënon, rëndësi ka që të fitojmë dhe kjo më bën akoma më të lumtur.”
