Për deklarimet e rreme në jug të vendit gjatë censusit, studiuesi dhe profesori Ardit Bido, flet në librin e tij të ri për betejën mbi 20 përqindëshin dhe planin për të greqizuar Bashkinë e Himarës dhe Konispolit.
Autori shpjegon se shtysa për realizimin e këtij studimi ishte identifikimi i grupimeve të caktuara të popullsisë shqiptare me identitet fluid.
Për herë të parë, paraqiten të dhënat e kombësisë nga regjistri i gjendjes civile, si dhe numri minimal dhe maksimal i atyre që kanë kombësi shqiptare në regjistër, por vetëidentifikohen grekë- që nuk i kalojnë 15% në asnjë prej dy bashkive.
Ai theksoi riskun e vetëdeklarimit të rremë në censusin 2023, duke rrëfyer implikimet politike që do të kishte Shqipëria nëse artificialisht numri i pakicës greke do të tejkalonte 20%.
Kjo do të bënte që nga Qafë Bota në Llogara të duhet të ngrihej flamuri grek krah atij shqiptar në institucionet shtetërore dhe greqishtja të bëhej gjuhë e dytë zyrtare.
Në forum morën pjesë zyrtarë, politikanë, studiues dhe profesorë të njohur, ku ndër to prof. dr. Paskal Milo bëri thirrje se problematikat e adresuara në libër duhet të gjejnë menjëherë zgjidhje nga elitat politike dhe akademike.
“Nuk mund të thuash ti që unë jam kinez, tajlandez se kështu më mbushet mendja mua, por duhet objektivisht të vërtetosh dhe kjo është detyrë e shtetit, e zyrave civile dhe autoriteteve të tjera që janë të ngarkuara me këtë çështje” – Dr. Ksenofon Krisafi.
