Pas dy shekujsh rritjeje eksponenciale, është e pashmangshme që popullsia botërore të pësojë një rënie të mprehtë, deri në fund të këtij shekulli. Në këtë përfundim ka dalë një studim i botuar në World dhe i kryer nga William Rees, autor i mbi 150 studimeve mbi rritjen dhe zhvillimin socio-ekonomik dhe babai i shprehjes “gjurmë ekologjike”.
Sipas Rees, konsumi ynë i paqëndrueshëm i burimeve të tokës dhe rritja eksponenciale e popullsisë e ka shtyrë shoqërinë moderne drejt një gjendjeje “mbi numër të avancuar”.
Të gjitha llojet e kafshëve janë të predispozuara natyrshëm të rriten dhe të riprodhohen derisa habitati i tyre të arrijë pikën e shkatërrimit. Kur kjo ndodh ka mungesë ushqimi, përhapje të sëmundjeve ose rritje të gjahut. Më pas, popullsia zvogëlohet, burimet bëhen sërish të disponueshme dhe habitati riparohet, duke lejuar që cikli të fillojë përsëri.
Por me njerëzit nuk ndodh saktësisht kështu. Fillimi i shfrytëzimit të lëndëve djegëse fosile lejoi një rritje të ushqimit dhe burimeve, duke shkaktuar një rritje konsekuente eksponenciale të popullsisë botërore, e cila në 200 vitet e fundit ka shkuar nga një në tetë miliardë.
“Ne kemi adoptuar një mënyrë jetese vetësabotuese, në të cilën burimet e kufizuara që kanë lejuar shoqërinë tonë industriale të lulëzojë, herët a vonë do të jenë të pamjaftueshme”, shpjegon Rees.
Fundi i burimeve dhe rënia e vazhdueshme e popullsisë mund të jetë problematike: varfëria, papunësia e përhapur, rënia e PBB-së, ulja e pagave, shërbimet sociale të mbingarkuara dhe zinxhirët e ndërprerë të furnizimit janë disa nga pasojat me të cilat mund të përballemi. Në skenarin më të keq, e gjithë shoqëria mund të shembet.
“Miliarda të mbijetuar mund t’u duhet të kthehen për të jetuar siç kanë bërë gjatë Epokës së Gurit. Nëse është kështu, nuk do të jenë banorët e qyteteve që përshtaten, por popullsitë e mësuara me një jetë të varfër rurale”, shpjegon Rees.
Është e qartë se vizioni i Rees nuk është aspak optimist, por a duhet të shqetësohemi për zhdukjen? Për fat të mirë, eksperti thotë se është një skenar “i pamundur”, duke pasur parasysh përparimet teknologjike që kemi arritur.
Megjithatë, pasojat negative, kaosi klimatik, mungesa e ushqimit dhe burimeve të tjera, çrregullimet civile, luftërat për burime, mund ta bëjnë të vështirë për një qytetërim të përparuar që të vendoset në një nivel global, përfundon ai.
