Kërkimet për naftë në Shpirag nuk po ndalojnë nga Qeveria Rama, por fitimet janë ato që po mungojnë. Edhe sot, njësoj si vitin 2019 dhe në 2020, Rama ‘ngre’ peshë popullin me lajme për zbulim nafte në Shpirag.
Edhe në Janar të vitit 2019, ai tregonte se zbulimi ishte vetëm pak javë larg e se do të ndikonte ekonominë shqiptare duke filluar nga viti 2020. Por, nuk ndodhi kështu!
Vitin e kaluar, zbulimi i radhës u bë nga Holanda, ku kryeministri u takua me homologun e tij Rutte. Në versionin e 2022, zbulimi që ishte prapë vetëm pak javë larg do të trondiste pozitivisht jo vetëm Shqipërinë, por edhe Europën.
Zbulimit të sotëm, sipas kryeministrit po i vjen fundit. ‘Durimit 10 vjeçar po i vjen fundi’– tha ai.
Madje kryeministri tha se qeveria po ngre sakaq Fondin Sovran që do të administrojë miliardat e dollarëve që Shqipëria do të fitojë nga nafta e Shpiragut. Ai tha se vendi është afër testit përfundimtar teknik të vlerësimit të qëndrueshmërisë së presionit të fluksit të gazit e të naftës, deri në sipërfaqen e tokës.
Tashmë do na duhet të presim e të shohim sesa kohë do kalojë deri në zbulimin e naftës së radhës…
