Çmimet e karburantit kanë shënuar një rritje të dytë brenda pak ditësh, me një shtrenjtim prej 8-9 lekësh për litër. Sot, një litër naftë tregtohet me 185 lekë, nga 179 lekë që ishte rritur pak ditë më parë, ndërsa më herët çmimi kishte zbritur në 176 lekë.
Operatorët e tregut treguan se rritja erdhi nga shtrenjtimi naftës në bursat ndërkombëtare. Sot, një fuçi naftë shitet 85 USD/Fuçia, mirëpo për të njëjtën vlerë në bursë, më herët e paguanim më pak se 175 lek/litri.
Bordi i Shefqet Kastratit, nëpërmjet kontrabandës, tatimeve, doganës e çdo organi tjetër, i ka penguar kompanitë të optimizonin blerjet në tregjet ndërkombëtare dhe ta shisnin më lirë karburantin. Ai i ka diktuar dhe i ka fiksuar vetë çmimet më të larta, për të mos na dhënë mundësi të zgjedhim më lirë.
“Kastrati” , “Gega Oil” dhe “Eida” nën urdhrat e Shefqet Kastratit në tregun oligopol ku ai s’mund të konkurrojë veten, vazhdojnë ta tregtojnë shtrenjtë naftën e benzinën, pavarësisht shkrirjes së Bordit.
Kastrati kontrollon 80% të tregut të naftës, depozitat, portin dhe strukturat shtetërore. Madje, për të dhe Ramën punon gjithashtu kreu i Autoritetit të Konkurrencës, Denar Biba, që deri më tani s’ka dënuar asnjë shkelje të Kastratit.
Bordi u shfuqizua në datën 7 qershor mirëpo ende në tregun e naftës veprohet si të mos ishte shkrirë kurrë. Ai u tregua tepër i kujdesshëm të rrisë çmimin e karburantit për çdo rritje minimale në bursë, por nuk e uli kurrë, kur vlera ra në bursa.
