Në këto temperatura ekstreme pishinat dhe plazhi duken si zgjidhja më e mirë për t’i kaluar këto ditë “përvëluese”.
Por mesa duket në plazhet publike të Shqipërisë gratë myslimane po ndjehen të paragjykuara dhe kërkojnë një plazh enkas për to.
Sugjerimin e ka dhënë pedagogia Malvina Tafçiu, e cila tha se duke qenë se shkojnë në plazh të mbulura, jo pak herë bien pre e provokimeve. Për të jetuar te lira, ajo mori modelin e Turqisë, që ka plazhe vetëm për gratë e mbulura.
“Po flasim për një shoqëri demokratike, që themeli i shoqërisë demokratike është diversiteti kulturor. Në momentin që ti shkel liritë themelore, individuale normalisht që ti minon konkretisht vetë të gjithë sistemin e jetës demokratike. Nëse unë shkoj në një plazh që nuk ka njerëz si unë, e di shumë mirë që do të paragjykohem sepse ata nuk e kanë problemin me veshjen time, e kanë me islamin në tërësi.
Përse në vend që t’ua mohosh të drejtën e plazhit grave myslimane dhe të bësh diskriminim nuk iu krijon mundësi për t’i shijuar plazhet dhe bukuritë e natyrës? Siç e ka Turqia, ka vende specifike për gratë myslimane. Një ndër plazhet që ne myslimanët frekuentojmë është Spilleja. Ka plot mënyra dhe forma se si unë ta shijoj jetën dhe të shfrytëzoj hapësirat publike,”u shpreh Tafçiu.
