Florian Kuka, një 11-vjeçar i talentuar shqiptar me origjinë nga Kopliku i Malësisë së Madhe ka performuar në skenë në koncertin e artistit me famë botërore Coldplay në stadiumin “Etihad” në Manchester.
I riu i lindur në Angli është përzgjedhur nga artisti në mesin e shumë fëmijëve të tjerë për të performuar në bateri në koncertin e 1 qershorit.
Kjo eksperiencë për të ishte dhurata më e bukur ndonjëherë, pasi në të njëjtën ditë festonte edhe ditën e tij të lindjes.
Floriani duke performuar në një stadium kaq të madh përpara 60 mijë vetave ishte një emocion i papërshkrueshëm për familjen e tij, veçanërisht nënën e cila nuk i fshehu emocionet ndërsa tregonte këtë arritje të të voglit të saj.
Për më tepër prindërve të fëmijëve që kanë performuar i janë dhuruar bileta falas në zonën “VIP” për të ndjekur koncertin. Në shenjë falenderimi për performancën e tyre të shkëlqyer në koncert Coldplay madje ka organizuar edhe një festë për fëmijët ku i janë shpërndarë edhe dhurata.
Performanca e vogëlushit Florian është ndarë nga Coldplay në Instagramin e tij.
Ky është vetëm një hap shumë i vogël për Florian Kukën drejt të ardhmes së tij të ndritur. Por, deri në një moment tjetër që ta ngrejë sërish lart emrin e Shqipërisë dhe origjinën e tij, jemi krenarë dhe e duartrokasim këtë arritje të vogëlushit shqiptar.
