Një 13-vjeçar shqiptar ndërroi jetë bashkë me të ëmën në një aksident në Ferrara, Itali. Pak ditë pas aksidentit, familjarët e viktimave kanë vendosur t’i dhurojnë organet e 13-vjeçarit, Dejvis Alla, për t’u ardhur në ndihmë atyre që kanë nevojë për to.
Familja Alla ka dhënë miratimin e saj, pas lajmit të vdekjes së tij, kur komisioni shëndetësor i komunikoi familjes vdekjen e 13-vjeçarit. Mësohet se Qendra e Transplantave në Bolonja ka sjellë edhe një ekip nga veriu i Italisë.
“Kemi menduar për fëmijë të tjerë, njerëz të tjerë që kishin nevojë, që falë Dejvis mund të kthehen në jetë”, është shprehur xhaxhai i Dejvis, teksa ndodhet pranë të vëllait, babait të 13-vjeçarit.
Dejvis Alla ndërroi jetë në spital, pas plagëve të rënda, ndërsa nëna e tij vdiq në vendngjarje. Arritën të shpëtonin djali i madh i familjes dhe motra 2-vjeçare.
