Presioni për votë në Shqipëri ka degraduar deri në përdorimin e dhunës. Në Patos, dy ditë më parë është dhunuar punonjësi i komunales në Bashki, Bato Dalipaj, pasi ka refuzuar të plotësojë një formular, në të cilin do të deklaronte 10 vota për të gjithë pjesëtarët e familjes së tij.
Dalipaj fillimisht ia tregoi ngjarjen kandidates së koalicionit “Bashkë Fitojmë”, e më pas ka denoncuar në Polici eprorin e tij, Petrit Pëllumbi, për ushtrim dhune ndaj tij. Gjatë deklaratës për mediat, Dalipaj tha se pasi refuzoi të firmoste, Pëllumbi i gjuajti me grushta duke e shtrirë në tokë.
“Më thirrën lart në zyrë dhe më ofruan një formular për të plotësuar për ta firmosur, të shkruaja pjesëtarët e familjes dhe nuk e pranova. I thashë jo. Formulari ishte për votimet. Mora rrugën dhe ika, më erdhi nga pas dhe më gjuajti, më shtriu përtokë. Më goditi Petrit Pëllumbi. Më ndihmuan shokët atje dhe pastaj më çuan në spital. Petriti është përgjegjës që ndan punën në Komunalen në Patos. Unë jam katërorarësh deri në qershor dhe mbaron, një vit kontratë”, denoncoi Bato Dalipaj.
Pak orë më pas, reagoi edhe Policia e Shtetit.
“Rreth orës 16:10, shtetasi B. D., 55 vjeç (punonjës i Ndërmarrjes së Komunales, Bashkia Patos), është paraqitur në Komisariatin e Policisë Fier, për të bërë kallëzim, duke pretenduar se në ambientet e punës, eprori i tij, shtetasi P. P. ka ushtruar dhunë fizike ndaj tij, për shkak nuk ka pranuar të plotësojë një formular. Specialistët për Hetimin e Krimeve të Komisariatit të Policisë Fier kanë njoftuar menjëherë Prokurorinë pranë Gjykatës së Rrethit Gjyqësor Fier, dhe në prani të oficerëve të Policisë Gjyqësore, shtetasit B. D. po i merret dëshmia në lidhje me rrethanat e ngjarjes, si dhe po kryhen të gjitha veprimet procedurale”.
Me afrimin e zgjedhjeve të ’14 Majit’ janë shtuar edhe rastet e shitjes së votës e madje edhe marrjes së saj me dhunë. Rasti i fundit ishte i Dalipajt, mirëpo në shumë zona, kërcënimet apo premtimet për votë bëhen çdo ditë. Punonjësit e Bashkive janë ‘aktivizuar’ këto zgjedhje duke tentuar të sigurojnë sa më shumë vota, e madje nuk kursyejnë as dhunën në rast se nuk ia dalin të marrin aq sa duhet.
*Për rastin e Dalipajt, ende nuk është marrë asnjë masë ndaj dhunuesit.
