Ekuinoksi i pranverës këtë vit ndodhi të hënën më 20 mars. Pas kësaj dite ju do të mund të shijoni orët e gjata nën rezet e diellit dhe perëndimet e vona.
Pas ekuinoksit pranveror, ditët do të vazhdojnë të zgjaten deri në solsticin e verës, në qershor. Në solsticin veror, ditët do të jenë më të gjata dhe netët më të shkurtra.
Nga ana astronomike, dita e parë e pranverës shënohet nga ekuinoksi i pranverës, i cili bie në 19, 20 ose 21 Mars, çdo vit. Ekuinoksi ndodh në të njëjtin moment në të gjithë botën edhe pse orët ndryshojnë sipas zonave. Pranvera do të zgjasë deri më 21 qershor, kur me kalendar fillon vera.
Ekuinoksi në astronomi është ai çast kohor (jo një ditë e plotë) kur qendra e Diellit mund të vëzhgohet drejtpërdrejt sipër ekuatorit tokësor. Thuhet edhe kur dielli bie në pus, domethënë pasqyrimi i diellit në një pus, fenomen që nuk ndodh dhe nuk mund të verifikohet në asnjë paralel tjetër tokësor.
Në këto dy data, dita dhe nata janë të barabarta, secila nga 12 orë. Gjatë baraznetëve, dielli lind saktësisht në lindje dhe perëndon me saktësi në perëndim.
Shqiptarët, fillimin e pranverës e kanë të lidhur me tokën dhe punët e bujqësisë. Për vende si Turqia dhe India ajo konsiderohet një feste familjare, ndërsa për popullin iranian ekuinoksi i pranverës shënon ditën e parë të vitit.
