Një dramë tjetër shënohet në familjen Saliaj në Tiranë. Saktësisht në zonën e Freskut, mbrëmjen e djeshme ka ndërruar jetë një 18-vjeçar, i quajtur Enjo Saliaj.
I riu ka humbur jetën pasi ka qenë duke drejtuar një motor elektrik, i cili u përplas nga një makinë. Enjo humbi jetën në spital, për shkak të plagëve të marra në trup.
Drejtuesi i mjetit që shkaktoi aksidentin Sildi Krashi, tashmë është arrestuar. Viktima jetonte me gjyshërit e tij nga ana e babait, pasi ky i fundit ishte ndarë nga jeta më herët.
Babai i Enjo Saliajt, Kudret Saliaj u vra në ambientet e gjykatës nga ish-vjehrri dhe ish-bashkëshortja, teksa kanë qenë në proces divorci.
Ngjarja ka ndodhur më 4 qershor 2021 në një lokal pranë Gjykatës Civile, në Tiranë, ku Mexhit Picari, 53 vjeç, vrau në mes të lokalit, bashkëshortin e vajzës, Kudret Saliaj 41 vjeç, pak minuta pas seancës së pestë. Po ashtu plumbat prekën dhe avokatin e viktimës Adriuatik Cama.
Hetimet e kryera në atë kohë zbuluan se Kudreti kishte marrë pesë plumba në trup nga vjehrri i tij.
Bëhet me dije se Enjo ishte nxënës në shkollën “Faik Konica” në kryeqytet, ndërsa pas shkolle punonte si korrier picash për të siguruar disa të ardhura për familjen e tij.
