Ka ndërruar jetë në moshën 54-vjeçare, Lisa Marie Presley. Ajo është fëmija i vetëm i legjendës së Rock’n’Roll-it, Elvis Presley.
“Me zemër të thyer më duhet të ndaj lajmin shkatërrues që vajza ime e bukur Lisa Marie na ka lënë”, shkroi nëna e së ndjerës, Priscilla Presley.
Mediat e huaja shkruajnë se këngëtarja e njohur u dërgua me urgjencë në spital mëngjesin e së enjtes dhe thuhet se ajo pësoi arrest kardiak.
Duke cituar burimet, TMZ shkruan se 54-vjeçarja u gjet pa ndjenja në shtëpinë e saj në Calabasas, Kaliforni.
“Ajo ishte gruaja më e fortë dhe më e dashur që kam njohur ndonjëherë. Ne kërkojmë privatësi ndërsa përpiqemi të përballemi me këtë humbje”, shkroi nëna e saj Priscilla Presley në një deklaratë.
Ndërkohë nëna e saj nuk dha detaje për shkakun e vdekjes. Sipas TMZ, këngëtarja u gjet pa ndjenja në dhomën e saj të gjumit. ish-Ish-bashkëshorti i saj Danny Keough, i cili po ashtu jeton në pronë, u përpoq t’i jepte ndihmën e parë. Më pas mbërritën mjekët që e dërguan në spital por nuk arriti të mbijetojë.
E lindur në vitin 1968, Lisa Marie vazhdoi të ndiqte gjurmët e babait të saj dhe filloi një karrierë në muzikë.
Ajo publikoi tre albume, me albumin e saj debutues në vitin 2003 që shiti qindra mijëra kopje dhe mori vlerësime përgjithësisht pozitive.
