Një peshkatar, ekuipazhi i të cilit shpëtoi 31 persona të bllokuar në Kanalin anglez ka treguar si emigrantët në rrezik për jetën rrethuan varkën e tij duke kërkuar ndihmë.
Raymond tha për Sky News se kishte qenë duke fjetur kur një anëtar i ekuipazhit të tij i tha se janë disa emigrantë pranë varkës që po kërkojnë ndihmë.
“Një djalë po varej pranë varkës duke thirrur për ndihmë. Fillimisht mendova se ishte vetëm ai dhe sapo mora pajisjet e mia të peshkimit, brenda tre minutave, ndalova varkën dhe vrapova jashtë ku pashë edhe pesë prej tyre që po mbështeteshin në anë të varkës”, tha ai.
Raymond u shpreh se ishin rreth 45 persona që mbanin gomonen e përmbysur pranë varkës së tij.
“Pasi pesë të parët u tërhoqën në bord nga ekuipazhi, pjesa tjetër e personave të bllokuar filloi të notonte drejt varkës. Ishte si një pjesë nga një film i luftës së dytë botërore, kishte njerëz në ujë kudo. Ne u nisëm dhe siguruam një litar në anë të varkës. Po përpiqeshim t’i tërhiqnim ata nga gomonia”.
Ai tha se personat që shpëtuan bashkë me ekuipazhin e tij ishin kryesisht nga Afganistani, Iraku, Senegali dhe India ndërsa theksoi se ata kishin deklaruar se i kishin paguar nga 5 mijë paund secili një trafikanti në Francë për të kaluar në Mbretërinë e Bashkuar.
