Data 6 dhjetor do t’i gjejë shkollat dhe administratën pushim.
Kjo pasi qeveria shqiptare ka vendosur këtë datë si ditë pushimi vetëm për Tiranën, e cila përkon me mbajtjen e samitit BE-Ballkani Perëndimor.
Ky vendim vjen për shkak të masave të sigurisë që po merren për ditën kur do të zhvillohet samiti, pasi në Tiranë do të mblidhen të gjithë liderët europianë.
Tirana do të blindohet me forca të shumta sigurie. Rreth 1500 efektivë pritet të jenë në terren për të siguruar mbarëvajtjen e samitit. Niveli i masave të sigurisë duket se do të jetë ‘i ashpër’.
Disa nga akset kryesore në vend do të bllokohen, përfshirë unazën për kalimin e makinave. Do të ketë edhe 16 nivele sigurie, që do të thotë kontrolle të ndryshme nga forcat e sigurisë.
Ndërkohë që prej disa ditësh ekipet e Brukselit ndodhen në Tiranë për të koordinuar punën me ekipet shqiptare sa i përket sigurisë. Ata po zhvillojnë trajnim me gardën dhe Policinë e Shtetit.
Këto masa të shtuara vijnë në një kohë kur Sali Berisha dhe Ilir Meta kanë paralajmëruar protestë para kryeministrisë pikërisht më 6 dhjetor.
Ndonëse Sali Berisha këmbëngul se do të mbajë protestën në Bulevardin ‘Dëshmorët e Kombit, duket se është e pamundur ta zhvillojë atë për shkak të masave të larta të sigurisë.
E gjithë zona përreth Kryeministrisë do të jetë e blinduar dhe me masa të larta të sigurie.
