Pasi këngëtarja Dua Lipa mori shtetësinë shqiptare ka reaguar edhe ambasadori britanik, Alastair King-Smith, i cili ka publikuar edhe një foto me këngëtaren.
Diplomati i lartë britanik me anë të një statusi në rrjetet sociale ka ftuar të gjithë qytetarët që ditën e nesërme të jenë në shesh, për të ndjekur koncertin e Dua Lipës me rastin e 110 vjetorit të Pavarësisë së Shqipërisë.
“Një nder të dëgjoj për momentet e veçanta nga turneu botëror i Dua Lipa-s dhe planet për koncertin e saj në #Tiranë.
E përgëzova për mënyrën sesi po u jep një platformë atyre zërave që duhet të dëgjohen.
Një moment i veçantë për #Shqipërinë, #Kosovën dhe #Britaninë teksa festojmë Ditën e Pavarësisë, Tirana European Youth Capital 2022 dhe #100Vjet marrëdhënie midis Mbretërisë së Bashkuar dhe Shqipërisë. Nëse ndodheni nesër në Tiranë, e dini ku duhet të jeni!” – shprehet Ambasadori Alastair King-Smith.
Nga sot, ylli i muzikës botërore, Dua Lipa zotëron edhe nënshtetësinë shqiptare. Këngëtarja shqiptare u betua si shtetasja më e re shqiptare para kryetarit të Bashkisë së Tiranës, Erion Veliaj. “Faleminderit shumë! Është një gëzim i papërshkrueshëm dhe një nder shumë i madh.
Jam shumë e emocionuar nga mikpritja, dashuria, mbështetja. Mezi pres koncertin e nesërm“, tha Dua.
Gjithashtu ajo ka bërë edhe një postim në Instagram, ku shprehet “krenare.”
Më herët, Dua u mirëprit nga presidenti e Republikës Bajram Begaj, i cili vlerësoi thjeshtësinë e saj. “Është kënaqësi e veçantë që sot presim artisten e madhe Dua Lipa.
Them artiste e madhe, por ajo është edhe një vajzë e thjeshtë, që krenarinë më të madhe na e ka dhënë ne, Shqipërisë, Kosovës dhe kudo ku ka shqiptarë nëpër botë. Rinia shqiptare ju ka shembull dhe ju keni treguar se ëndrrat arrihen duke punuar gjithnjë e më shumë. Ti i ke bërë të gjithë shqiptarët bashkë! Ndaj kam kënaqësinë t’ju jap shtetësinë shqiptare”, u shpreh Begaj.
