Këngëtarja e njohur, Dua Lipa ka marrë nënshtetesinë shqiptare. Ajo është pritur së fundmi në Presidencë së bashku me familjen e saj.
Asaj iu dorëzua nënshtetësia shqiptare nga Presidenti i Republikës, Bajram Begaj.
Presidenti Begaj ka thënë edhe dy fjalë për Dua Lipën, duke u ndalur edhe tek karriera e saj si artiste e njohur me famë ndërkombëtare.
“Është kënaqësi e veçantë që sot presim artisten e madhe Dua Lipa. Them artiste e madhe, por ajo është edhe një vajzë e thjeshtë, që krenarinë më të madhe na e ka dhënë ne, Shqipërisë, Kosovës dhe kudo ku ka shqiptarë nëpër botë. Rinia shqiptare ju ka shembull dhe ju keni treguar se ëndrrat arrihen duke punuar gjithnjë e më shumë. Ti i ke bërë të gjithë shqiptarët bashkë! Ndaj kam kënaqësinë t’ju jap shtetësinë shqiptare”, tha ndër të tjera Presidenti Begaj.
Kujtojmë që Dua Lipa ndodhet në kryeqytet me rastin e festave të nëntorit. Ajo do të mbajë edhe një koncert falas për të gjithë fansat e saj.
Shqiptarja me famë botërore, e cila do të përmbyllë turneun e saj “Future Nostalgia” në tokën shqiptare, ka bërë me dije se koncerti do të mbahet në sheshin “Skënderbej” ditën e Flamurit.
Me anë të një postimi në faqen e “Sunny Hill Festival”, Dua u shpreh:
“Emocioni është i madh për spektaklin “Future Nostalgia”, i cili do të mbahet në Tiranë, Shqipëri, në sheshin ‘Skënderbej’ më 28 nëntor 2022. Është nder të festosh një ngjarje kaq të rëndësishme – 110 vjetorin e Pavarësisë.”
