“Drama” e Cristiano Ronaldos dhe Manchester United duket se i drejtohet në mënyrë të pashmangshme një fundi jo të mirë.
Gjithçka nisi në verë kur në klubin anglez u emërua trajneri Erik ten Hag, i cili ishte i prerë në vendimin e tij për të ndërtuar një ekip pa portugezin në organikë.
Intervista “bombë” e Ronaldos, e publikuar së fundmi nxorri në shesh shumë të vërteta, të paktën sipas portugezit, që u shpreh se shumë persona kërkuan ta largonin nga klubi dhe jo vetëm trajneri, për të cilin theksoi se nuk ka respekt. Fjalë të rënda për një klub si United që mesa duket tashmë ka marrë edhe vendimin përfundimtar mbi sulmuesin portugez.
Veprimi i fundit nuk lë shumë për të interpretuar teksa nga Old Trafford është larguar muralja në të cilën ishte fotoja e CR7. (VIDEO KËTU)
Tashmë, Ronaldo është në merkato dhe në janar pritet të ndryshojë ambient me Bayern Munich që është përfolur si një destinacion i mundshëm, por në lojë janë edhe të tjera klube veçanërisht nga Premier League, ku nuk mungon interesi i Chelsea apo Arsenal në prapaskenë.
Ronaldo, i vendosur për të shkuar në Kupën e Botës të Katarit me Portugalinë, ndoshta i fundit i tij si lojtar duke pasur parasysh moshën e tij (37), tha se ai po detyrohej të largohej nga trajneri i United, Erik Ten Hag dhe të tjerë në klub. Ai madje sulmoi ish-shokun e skuadrës Wayne Rooney, dhe vuri në pikëpyetje evolucionin e klubit në atë që ka të ngjarë të shënojë fundin e karrierës së tij me Djajtë e Kuq.
Natyrisht, nuk mund të mungonte as një reagim nga klubi, i cili është vënë në diskutim nga portugezi. Ky i fundit e cilësoi ambientin e “djajve të kuq” si të ndalur në kohë që kur ishte larguar Aleks Ferguson, i keqmenaxhuar dhe që kishte humbur shumë nga progresi që kishin bërë klubet e tjera.
