Aplikacioni i mesazheve, WhatsApp, në pronësi të Meta, ndaloi së funksionuari në shumë vende të botës. Mijëra përdorues të aplikacionit raportuan se nuk janë në gjendje të dërgojnë ose marrin mesazhe në format tekst ose video.
Sipas Downdetector, një platformë që gjurmon faqet e internetit, ka pasur rreth 26.000 raportime nga përdoruesit në lidhje me funksionimin e aplikacionit. Ndërsa 69% e të përdoruesve të WhatsApp u përballën me probleme me dërgimin e mesazheve, 24% kishin probleme me lidhjen me serverin dhe 7% kishin probleme me aplikacionin e përgjithshëm.
“Ne jemi të vetëdijshëm se disa njerëz aktualisht kanë probleme me dërgimin e mesazheve dhe po punojmë për të rikthyer WhatsApp sa më shpejt të jetë e mundur”, tha zëdhënësi Meta, cituar nga agjencia e lajmeve ANI.
WhatsApp for Business, versioni i platformës i krijuar për kompanitë dhe bizneset për të kryer transaksione tregtare, tregoi gjithashtu një rritje të numrit të ankesave në Doëndetector pasi përdoruesit nuk ishin në gjendje të kryenin asnjë komunikim.
WhatsApp ka rreth dy miliardë përdorues aktivë në të gjithë botën.
Nuk është e qartë se çfarë e shkaktoi problemin, i cili nuk është zgjidhur ende. Deri në këto momente, WhatsApp nuk i është përgjigjur raporteve për ndërprerjen. Kujtojmë se në muajin Gusht, WhatsApp rifreskoi karakteristikat e tij duke sjellë ndryshime për grupet e bisedave në aplikacion.
Kështu, nëse jeni anëtar i një grupi dhe doni të dilni prej tij, të tjerët nuk do të njoftohen për këtë pasi kutia e njoftimit që shfaqet sa herë një person lë grupin, nuk do të shfaqet më. Gjithashtu, përdoruesit nuk do të shohin nëse një anëtar i grupit është online.
Si dhe njoftohet çaktivizimi i screenshots për fotot që dërgohen me opsionin View Once, të cilat zhduken pasi hapen herën e parë.
