Ditën e sotme ( 17 tetor) ka nisur viti i ri akademik 2022-2023. Mirëpo në ndryshim nga vitet e tjera këtë vit pedagogët nuk kanë qenë në auditore për të mirëpritur studentët e tyre.
Në vend të tyre, ata kanë gjetur vetëm disa pankarta për t’ju bashkuar protestës së tyre e cila ka disa ditë që ka nisur. Protesta e tyre e cila bëhet me dije se do të vazhdojë, synon plotësimin e kërkesave të tyre, lista e të cilave kryesohet nga rritja e pagës dhe përmirësimi i kushteve të punës.
Sipas pedagogëve këto kritere janë të panegociueshme dhe në rast se nuk plotësohen do të vazhdojë bojkoti nëpër universitete. Nga ana tjetër pedagogët e ngritur në protestë janë shprehur se nuk ndihen mirë që studentët duhet të përballen me këtë gjendje në fillim të vitit të tyre akademik.
Por, sispas tyre plotësimi i këtyre kërkesave që ato kanë parashtruar do t’iu siguronte dhe studentëve një arsim më cilësor. Mësohet se protesta nuk do të bëhet gjatë gjithë orëve të mësimit, por të paktën dy orë çdo ditë të javës. Kjo për t’i treguar qeverisë rezistencën e tyre deri në plotësimin e kërkesave.
Ndërkohë ditën e sotme u përfol që edhe kryeministri i vendit Edi Rama mund të marrë pjesë në protestë, pasi u vu re një prani e Gardës së Republikës.
Nga ana e tij kreu i Sindikatës Sandër Kovaçi tha se bojkoti do të vijojë deri në plotësimin e kërkesave.
“Në çdo universitet të Shqipërisë bëhet fjalë për bojkot. Prania është e lartë”, tha kreu i Sindikatës Sandër Kovaçi.
Ndërsa përsa i përket pranisë së Ramës në protestë Kovaçi shprehet se ‘Ishte mesa duke testuar situatën. Erdhi me duket për të bërë një inaugurim laboratori, por u larguan.”
Më tej ai shtoi se është bërë thirrje që bojkotimi të jetë i plotë.
“Mësim nuk bëhet, të gjithë janë dakord për bojkotin. Bojkoti do të jetë në mënyrë të përhershme. Nga kryeministri apo qeveria ende nuk kemi komunikim”, është shprehur ai.
