Zhdukja e Ervis Martinajt vazhdon të mbetet mister prej 26 ditësh pa asnjë shenjë prej tij. Dyshime të forta janë ngritur për një ekzekutim të mundshëm të tijin, apo një skenar tërheqje nga aktiviteti i tij i zakonshëm.
Për “Ora News”, babai i Vis Martinajt ka treguar se nuk ka më shpresa për ta gjetur djalin të gjallë, megjithëse ende s’ka hapur asnjë mort në banesën e tij.
“Ne jemi në një situatë jo të mirë, ndodhemi në momente zie. Shtëpia ime është në mort dhe ka hapur dyert për ngushëllim, pasi unë kam humbur nipin tim Brilantin. Në këtë shtëpi, nuk ka asnjë mort të hapur për djalin, Ervisin, megjithëse shpresat e mia për gjetjen e tij gjallë, tashmë janë shuar plotësisht…” – tregon Mustafai.
Kush e do të vdekur Vis Martinajn? Sipas babait, njerëzit që e kërkonin dhe kanë financuar vrasjen e Visit, janë ish-shokët e tij më të afërt, që ai i ndihmoi dhe i pasuroi me para dhe tashmë të gjithë bashkë ju kthyen kundër.
“…nga Dokle, Reçët, Dukat e grupet në Tiranë dhe grupi i Vlorës, kanë kërkuar në mënyrë të vazhdueshme vrasjen tij. Dhe gjatë kësaj kohe, ia vranë të gjithë shokët…”, tha Mustafa Martinaj.
I moshuari, shton se në këtë sulm ndaj Ervis Martinaj dhe familjes së tij, u futën dhe instrumente shtetërorë të qeverisjes dhe oligarkë të njohur, që ndërtojnë vila në tokat e Dhërmiut.
Toka këto që familja Martinaj, sipas 70-vjeçarit i ka të trashëguara nga Alqiviadh dhe Eftalia Nina, por tashmë janë zaptuar nga oligarkët e lidhur me qeverinë.
Hetimet kanë provuar se Martinaj, u zhduk pa asnjë gjurmë në zonën e Shijakut mbrëmjen e 9 gushtit dhe dyshohet shumë se është futur në kurth pikërisht nga njerëzit që ai ka shkuar të takojë në Shijak.
