Një ngjarje jo fort e këndshme ndodhi gjatë një koncerti të grupit “Mirror” në Hong Kong, teksa ekrani gjigant u shkëput dhe ra në skenë, mbi balerinët që po performonin.
Video e ekranit që bie po bën xhiron e rrjetit, ndërsa mediat e huaja bëjnë me dije se përveç dy balerinëve të plagosur, u lënduan edhe tre persona nga audienca.
“Jam i tronditur,” tha shefi ekzekutiv i Hong Kongut, John Lee. “Shpreh ngushëllime për ata që u lënduan dhe shpresoj që të shërohen shpejt”.
Sipas shefit ekzekutiv, qeveria do të hetojë dhe rishikojë procedurat e sigurisë për mbrojtjen e këngëtarëve, trupës performuese, stafit dhe gjithashtu publikut.
Fatmirësisht, asnjë nga anëtarët e grupit “Mirror” nuk u lëndua nga kjo ngjarje.
Grupi i famshëm kishte planifikuar të mbante 12 shfaqje në vend, por duket se me këtë që ndodhi, do të kenë pengesa e probleme.
Qeveria i ka urdhëruar djemtë të shtyjnë shfaqjet e tyre të ardhshme, sepse për momentin të gjithë janë të tronditur dhe po marrin veten. Po ashtu, do të bëhet një kontroll i imtësishëm nëse pajisjet dhe skena e tyre janë të sigurta për punën në vazhdim.
“Nga vëzhgimi fillestar, një tel u këput dhe çoi në rënien e ekranit dhe shkaktoi që kërcimtarët të lëndoheshin,” tha Sekretari i Kulturës Kevin Yeung në një konferencë për media.
