Martesa e tyre do të zhvillohet më 8 tetor, në ditëlindjen e Mbretit Zogu I, një ditë e cila do të marrë edhe më shumë kuptim për ta pas ceremonisë së kurorëzimit.
Rreth dy javë para dasmës së Princi Leka II me Elia Zaharias janë mësuar disa detaje, mes të cilëve emrat e ftuar nga familjet mbretërore evropiane. Megjithatë emrat e të pranishmëve mbahen të fshehtë nga Princi dhe Elia.
Pritet që të jenë të pranishëm princër dhe princesha nga oborret mbretërore fqinje, si Mali i Zi, Rumania, por edhe të largëta si Princi dhe Princesha e Suedisë, ndonëse kjo nuk është konfirmuar zyrtarisht.
Çifti mban marrëdhënie me Princin Nikolai të Malit të Zi, i cili nga martesa me Princeshën e ndjerë Francine Navarro, ka një vajzë, Princesha Altinai, dhe një djalë, Boris-in. Gjithashtu shkëmbime kanë pasur edhe me oborrin mbretëror të Rumanisë, ku Princi Radu dhe Princesha Margarita kanë organizuar një darkë në Pallatin Elizabeta, në nder të Princit Leka II.
Princi dhe Princesha e ardhshme shqiptare ishin të ftuar në 2013-n në dasmën e madhe të Princit Muhammed Ali të Egjiptit me princeshën Noal Zaher të Afganistanit, që u mbajt në pallatin Cirigan në Stamboll. Siç është tradita, pritet që edhe ata t’ua kthejnë nderin duke qenë të pranishëm në dasmën e 8 tetorit.
Elia Zaharia ka shprehur admirimin për Princeshën Lea të Belgjikës, për përkushtimin në punë bamirësie.
Me kureshtje pritet në do të jenë të pranishëm Princi Carl Philip i Suedisë dhe Princesha Sofia, dy prej emrave më të njohur të familjeve mbretërore nëpër botë. Martesa e tyre në 2015-n tërhoqi shumë vëmendje tek mediat në mbarë botën, pasi Sofia më parë kishte modeluar për revista meshkujsh.
Këtë prill Princi Leka u ftua për një audiencë private nga Princi Alberti II i Monakos në oborrin princëror. Princi i Monakos është i martuar me princeshën Charlotte, e cila njihet për stilin e saj të veshjes dhe bukurinë.
Por ende nuk janë bërë publikë emrat e të gjithë të ftuarve të rëndësishëm, ndoshta për arsye sigurie.
