Nga dita e sotme e në vazhdim Italia do të heqë të gjitha rregullat e hyrjes për udhëtarët ndërkombëtarë.
Turistët e pavaksinuar nuk do duhet të bëjnë test përpara se të vizitojnë vendin.
Lajmin e ka bërë të ditur Ministria italiane e Shëndetësisë e cila tha se kërkesa aktuale për të paraqitur një leje për COVID pas mbërritjes në Itali nuk do të kërkohet më.
“Nga data 1 Qershor nuk do të kërkohet “green pass” për të hyrë në Itali. Urdhri i Ministrit të Shëndetësisë që parashikon hyrjen në Itali me Certifikatën “Green” të Covid-19 (green pass) skadon më 31 maj. Masa nuk do të zgjatet”, thuhet në njoftimin e Ministrisë.
Sipas deklaratës së ministrit, duke filluar nga sot, të gjithë udhëtarët, pavarësisht nga vendi i origjinës, nuk do t’u kërkohet më të kenë një çertifikatë të vlefshme vaksinimi, rikuperimi apo testi kur të arrijnë në Itali.
Kjo do të thotë se të gjithëve do t’u lejohet hyrja pa kufizime.
Italia është një nga vendet e BE-së që ka mbajtur disa nga kufizimet më të rrepta për shkak të shkallës së lartë të infeksionit që po regjistronte gjatë fazave të hershme të pandemisë.
Deri më tani, të gjithë udhëtarëve u është kërkuar të tregojnë një certifikatë vaksinimi që vërteton se mbajtësi ka kryer vaksinimin parësor në nëntë muajt e fundit ose ka marrë një vaksinë përforcuese. Italia pranoi gjithashtu certifikatat e rikuperimit që vërtetojnë se mbajtësi është shëruar nga COVID në nëntë muajt e fundit si dhe rezultatet e testit COVID-19.
Megjithatë, me sezonin veror të udhëtimeve që është afër dhe me shumicën e vendeve të tjera të BE/ZEE që kanë hequr rregullat e hyrjes, Italia vendosi të bëjë të njëjtën gjë.
