Peshëngritësja shqiptare, Evangjelia Veli ka shkruar histori! Ajo sapo është shpallur Kampione Europe në stilin e shkëputjes dhe dygarësh për peshën deri në 55 kg.
Jo vetëm kaq, por ajo mori edhe një medalje të argjendtë në stilin e shtytjes në Kampionatin Europian të Peshëngritjes.
Kësaj here, Evangjelia Veli arriti të korrë suksesin që ka kërkuar. Kujtojmë që vjet ajo mori një medalje të bronztë po në këtë disiplinë
“Ishte një garë e vështirë, pasi rivaliteti ishte shumë i lartë. Pozitiv ishte fakti që nuk u stresova, edhe pse e dija që sportistet e tjera ishin përgatitur dhe stërvitur ashtu siç duhej për një kampionat të tillë, sidomos në një vit kualifikues për në Lojërat Olimpike. Kështu që, pritej një garë me rivalitet të lartë, aq më tepër që kjo kategori peshe është ndër më të fortat e Europianit. Fitimi i medaljes është një kënaqësi e madhe, duke parë vështirësitë, stërvitjen e pakët dhe stresin e kaluar. Megjithatë, unë synoj për më shumë dhe të them të drejtën kisha mundësi për më tepër, ku pesha 108 kg në shtytje do të më kishte dhënë medalje edhe në dygarësh, por megjithatë kemi Kampionatin Botëror dhe shpresoj që gjërat të shkojnë edhe më mirë”, tha ajo një vit më parë për Panorama Sport.
