“Vetëm po-ja, është po”, pra vetëm nëse femra shpreh pëlqimin e saj nuk do të konsiderohet rast dhune. Kjo është përmbledhja e ligjit të ri spanjoll për dhunën seksuale që do t’i lejojë viktimat të mbrohen më mirë dhe të ndëshkojnë ata që janë fajtorë për krime të tilla.
Ligji kaloi në Kongresin e Deputetëve me 201 vota pro, 3 abstenime dhe 140 kundër, nga Partia Popullore dhe Vox, të dyja të së djathtës.
I quajtur zyrtarisht “Ligji për garantimin e lirisë seksuale”, ky legjislacion i ri, përveç miratimit të masave të tjera të shumta, barazon efektivisht krimin më të lehtë të abuzimit seksual (me mungesën e dhunës) me atë më të rëndë të sulmit seksual .
Debati spanjoll për temën e pëlqimit ka qenë një nga më aktivët që nga viti 2016, vit në të cilin, gjatë festës “SanFermin” në Pamplona, pesë burra sulmuan një vajzë dhe morën dënim vetëm për abuzim seksual, më pas u rishikua nga Gjykata e Lartë si agresion seksual, e cila e ngriti dënimin nga 9 në 15 vjet burg.
Gjykata e Navarrës, këmbënguli në mungesën e rezistencës të mjaftueshme nga ana e viktimës, duke shtruar kështu problemin e rishikimit të ligjit për dhunën seksuale.
Ministrja e Barazisë, Irene Montero, nga Podemos, tha se Spanja tani po bëhet “një vend më i lirë dhe më i sigurt për të gjitha gratë”. Megjithatë, ka nga ata që ende kundërshtojnë ligjin duke e konsideruar atë si një rrezik.
E vetmja siguri, përtej 2143 raporteve të përdhunimeve të paraqitura në Spanjë në vitin 2021, është teksti i ligjit që thotë: “Do të konsiderohet se ka pëlqim vetëm kur ai është shprehur lirisht me vepra të cilat, duke pasur parasysh rrethanat e rasti, shprehin qartë vullnetin e personit në fjalë”.
Shpresa është që legjislacioni i ri të lejojë më shumë vajza të marrin guxim dhe të denoncojnë, duke kapërcyer kufirin e turpit, për të cilin shumë prej tyre preferojnë të heshtin nga frika se mos gjykohen.
