Ismail Morina, tifozi shqiptar, i njohur ndryshe me nofkën “Ballisti”, raportohet të jetë arrestuar ditën e sotme. Morina thuhet të jetë ndaluar nga policia e Kukësit sot në mëngjes. Lajmi i arrestimit të tij është bërë i ditur nga një faqe në rrjete sociale që administrohet nga Morina dhe njerëz të afërm me të. Në shkrim ata kanë pretenduar se arrestimi vjen me urdhër nga Serbia.
“Sot, date 25/05/2022, ora 09:30, autoritetet e “RILINDJES” arrestojnë ISMAIL MORINËN në Kukës. Persekutimi vazhdon në simbiozën e etërve të tyre komunist me urdhën nga BEOGRADI i Miladinve ndaj shpirtit te lirë.
Për çdo ndodhi të mëtejshme do u informojmë! Rroftë shpirti i Shqiptarit!! ZOTI është SHQIPTAR!!!”, shkruhet në postim.”
Reagimi i ish-kryeministrit Sali Berisha ka qenë i menjëhershëm. Nëpërmjet një postimi në rrjetin social “facebook”, Berisha shkruan se tifozi i zjarrtë i Kombëtares, Ballist Morina që mbahet mend për dronin e Serbisë është arrestuar.
Ai ka bërë thirrje për lirimin e menjëhershëm të tij duke ftuar për ndihmë edhe organizatat ndërkombëtare për të drejtat e njeriut.
Postimi i plotë i Kryeministrit:
“Rama me urdher te Beogradit arreston superfansin e kombetares tone Ismail Morina.
Kerkoj lirimin e tij urgjent.
Te dashur miq, me urdher te Edi Rames arrestohet sapo vuri kemben ne dheun e tij Ismail Morina si hakmarrje per dronin qe leshoi ne stadiumin e Beogradit me figurat e Ismail Qemalit dhe Isa Buletinit dhe qe harboi fare ultranacionalistet serb me ne krye serbomadhin Vuçiç.
Qe nga ajo kohe Ismail Morina eshte shnderruar ne njeriun me te persekutuar ne Ballkan. Rama dhe Vuçiç perkatesisht sherbimet e tyre sekrete kane montuar kunder Ballistit kurthe te ulta dhe sajuar akuza pa asnje baze.
Denoj me ashpersine me te madhe arrestimin e Morines dhe kerkoj lirimin e menjehershem te tij. Ju bej thirrje te gjitha organizatave nderkombetare te te drejtave te njeriut te nderhyne per lirimin e tij te menjehershem dhe te denojne persekutimin politik te Morines nga binomi famekeq Rama-Vuçiç.”
Policia ka konfirmuar arrestimin e Ballist Morinës ku sipas njoftimit ai u ndalua pasi gjatë verifikimeve ka rezultuar person në kërkim nga Drejtoria Vendore e Policisë Durrës.
Informacion paraprak nga policia:
Efektivët e Komisariatit të Policisë Kukës ndaluan shtetasin Ismail Morinaj, 40 vjeç, banues në fshatin Shikaj, Kukës, i shpallur në kërkim për llogari të DVP Durrës. Ky shtetas u ndalua pasi gjatë verifikimeve ka rezultuar person në kërkim nga Drejtoria Vendore e Policisë Durrës.
Për këtë shtetas, Gjykata e Rrethit Gjyqësor Durrës ka vendosur revokimin e vendimit penal të Gjykatës së Rrethit Gjyqësor Tiranë, për lirimin e tij me kusht dhe ka caktuar vuajtjen e pjesës së mbetur të dënimit, 5 muaj e 12 ditë burgim, për veprën penale “Prodhimi dhe mbajtja pa leje e armëve luftarake dhe municioneve”. Procedurat e mëtejshme për këtë shtetas do të kryhen nga DVP Durrës.
