Rita Ora nuk e harroi në asnjë moment origjinën e saj, por as edhe vuajtjet që kaloi në fëmijëri për t’i mbijetuar trazirave. “Është për çdo gjë nga të qenit refugjate, nga fluturimi nga Kosova dhe jeta në Londër, duke pasur këtë qytet të mahnitshëm që është i çmendur dhe plotë drita”. Kështu e tha Rita Ora lidhur me subjektin e këngëve të albumit të saj të ri, që pritet të prezantohet këtë vit. E larguar nga Kosova kur ishte vetëm 1 vjeçe, shumë vite më vonë ajo do të bëhej Ambasadore Nderi e vendlindjes së saj.
Jeta si refugjate nga Kosova që kishte kërkuar strehim në Londër do të jetë përmbajtja e albumit të ri muzikor të këngëtares shqiptare, i cili do ta shoh dritën së shpejti.
Artistja me famë botërore është duke punuar për ta realizuar albumin e saj të dytë të shumëpritur, që për subjekt të këngëve do ta ketë jetën private të këngëtares. Në një intervistë për “Evening Standard”, Ora e ka përshkruar projektin e ri të bazuar në ngjarje reale me tekst të besueshëm nga jeta e saj.
“Unë nuk jam rritur vetëm si individ, por si një grua. Njerëzit do ta shohin këtë. Është çdo gjë nga jeta ime personale, për atë që unë nuk mund ta bëja për shkak të situatave të mëparshme dhe tani të qenët e lirë. Unë kurrë nuk kam qenë më e lirë se sa jam tani”, ka thënë Ora për “Evening Standard”.
Këngëtarja nga Kosova ka thënë se aktualisht është duke punuar në studio regjistrimi dhe ka për qëllim që këtë projekt ta ketë gati deri në fund të vitit.
Ndërsa gjatë një interviste për “Vanity Fair”, këngëtarja është shprehur: “Kjo është periudha më emocionuese dhe më krijuese e jetës time. Jam ndoshta nga të paktat artiste nga Kosova, të cilat janë të suksesshme. Femrat atje nuk e kanë lirinë krijuese për të shprehur vetveten dhe për t’u dëgjuar. Kam takuar vajza nga mosha 10 deri në 30 vjeçe dhe jam duke punuar me UNICEF për të krijuar një projekt ku këto femra mund të shprehin veten. Muzika është dashuria ime e parë, është arsyeja pse jam këtu ku jam sot”.
Gjithashtu Rita Ora u pyet edhe lidhur me miqësinë me legjendën e muzikës Prince: “Ai ishte një nga miqtë e mi më të mirë, ai ishte engjëlli im mbrojtës. Unë shkova në Paisley Park për afro dy javë, erdhi edhe motra ime dhe regjistruam rreth katër këngë atje… Ai ishte personi i duhur për të marrë këshilla. Ende lexoj email-et që më ka dërguar”.
Burimi: Evening Standard
