Aktori Amos Zaharia ka folur së fundmi në lidhje me jetën e tij private pas ndarjes së bujshme me këngëtaren Gigliola Haveriku vitin e kaluar.
Në një intervistë për “Rrugëtim me Anilën” aktori shprehu se ka vendosur që mos të rrëfejë më asgjë në lidhje me jetën e tij private, pasi prej 6 vitesh nuk i ka fshehur asgjë publikut. Ai shtoi se “realisht dëshiron të ketë një jetë të tijën personale.”
“Është ana private dhe njerëzit nuk e di pse kanë qejf t’i fusin hundët në gjëra personale që ndodh në jetën e një personi publik. E gjithë bota po shikon tani gjyqin e Johnny Depp me Amber Heard vetëm për të kuptuar dhe për të parë detaje nga jeta e tyre përditshme. Nuk e di pse kemi këtë dëshirën, ne kemi shumë qejf të dimë sa më shumë sekrete. Unë për 6 vite i kam thënë të gjitha, jeta ime private nuk ka qenë private por ka qenë publike dhe nuk i kam fshehur asgjë shtypit rozë. Por nga tani e tutje kam vendosur që jetën time ta mbaj private dhe jo që të ngall interes te mediat por realisht për të pasur një jetë të timen private.”– tha Amos në “Rrugëtim me Anilën.”
Amosi foli gjithashtu për familjen ku theksoi se është ende i ri dhe ka kohë për ta ndërtuar. Sipas Amos-it nuk ka një moshë fikse se kur vjen koha e duhur për të krijuar familje, por njeriu ka nevojë për eksperienca që të zgjedhë më mirë në të ardhmen.
“Është aty, kam kohë për të ndërtuar një familje, në sensin që një mashkull edhe në moshën 40-vjeç është akoma në kohë. Mendoj që thjesht njeriu ka nevojë për eksperiencë për të ditur më mirë se çfarë të zgjedhë në të ardhmen. Por nuk është se kam një moshë fikse. Është një llotari që të bie, por unë me mendjen tim them se deri në moshën 40-vjeçare nuk e kam me ngut.”- tha Zaharia.
