10 korridore humanitare do të funksionojnë këtë të enjte në Ukrainë për të evakuuar qytetarët.
Iryna Vereshchuk tha se banorët që përpiqen të largohen nga qyteti i rrethuar i Mariupolit do të duhet të përdorin automjetet e tyre.
Trupat ruse po përpiqen që të marrin kontrollin e plotë të rajonit të Donbasit në Ukrainën lindore, ku përfshihen Donetsk dhe Luhansk.
Ushtria ukrainase tha se trupat ruse po bëjnë përpjekje për të thyer mbrojtjen e tyre në rajonin e Donetskut.
Forcat ukrainase thanë se kanë marrë përsëri Osokorivka pranë Khersonit.
Forcat ruse po vazhdojnë gjithashtu përpjekjet për të marrë qytetin jugor të Mariupolit dhe bombardimet po vazhdojnë në Kharkiv në verilindje.
Trupat ruse po përdorin linjat hekurudhore për të lëvizur ngarkesat ushtarake.
Armët dhe pajisjet e tjera mbërritën në stacionin hekurudhor Kupyansk në verilindje nga stacioni Valuyki në Belgorod të Rusisë.
Ministri i Jashtëm i Ukrainës, Dmytro Kuleba ndodhet në Bruksel për bisedime me aleatët e NATO-s.
Në një konferencë shtypi me Sekretarin e Përgjithshëm të NATO-s, Jens Stoltenberg, ai tha: Agjenda ime është shumë e thjeshtë. Ajo ka vetëm tre pika në të. Janë armët, armët dhe armët.
“Ne dimë se si të fitojmë, por pa furnizime të qëndrueshme dhe të mjaftueshme të të gjitha armëve të kërkuara nga Ukraina, këto fitore do të shoqërohen me sakrifica të mëdha.”
“Sa më shumë armë të marrim dhe sa më shpejt të mbërrijnë në Ukrainë, aq më shumë jetë njerëzore do të shpëtohen. Nuk do të shkatërrohen më qytete dhe fshatra si Bucha.”
“Mund të tingëllojë e çuditshme, por sot armët i shërbejnë qëllimit të paqes”, përfundoi ai.
Ai tha se Ukraina ka nevojë për avionë, automjete dhe sisteme të mbrojtjes ajrore nga aleatët e NATO-s.
Stoltenberg tha se është i sigurt se në bisedimet mes ministrave të jashtëm të NATO-s dhe Ukrainës do të trajtohet nevoja për më shumë armë.
Ai tha se aleanca ushtarake e kupton që Ukraina ka nevojë për më shumë sisteme të mbrojtjes ajrore, armë antitank dhe lloje të tjera.
