I tmerrshëm, maniak dhe makthi i të gjitha vajzave, këto janë ‘epitetet’ që i janë vendosur 30-vjeçarit agresiv, Denis Telo.
Besoj se edhe ju keni dëgjuar për të.
Ditën e djeshme emri i Denisit bëri sërish bujë, pasi në rrjetet sociale u publikua videoja e tij ku shfaqej duke ushtruar dhunë fizike ndaj dy vajzave në rrugët e Tiranës.
Viktimat e radhës ishin motrat aktiviste, Albina Ruko, 26-vjeç dhe Mirela Ruko, 29-vjeçe, të cilat janë sulmuar dhe goditur me grushta teksa ecnin në rrugë. Të dyja motrat kanë mbetur me shenja në fytyrë pas dhunës së ushtruar pa asnjë arsye.
Sot agresori u arrestua nga uniformat blu për veprimin e bërë, por pyesim veten edhe sa vajza të tjera duheshin dhunuar fizikisht që shteti të ndërhynte?
E vërteta është që Denisi ka ushtruar dhunë ndaj vajzave e grave edhe herë të tjera, por kundrejt tij nuk është marrë asnjë masë.
Edhe kur 30-vjeçari u arrestua për herë të parë për një situatë të ngjashme, ai sërish u la i lirë.
Ndaj Denisit ka të paktën 9 kallëzime në komisariat por asnjëherë nuk u ndërmor ndonjë masë serioze nga policia, duke e lejuar të endej i lirë nëpër rrugët e Tiranës, ndonëse qartazi ai ishte një rrezik i madh për shoqërinë, pasi siç dihet djali ka probleme të shëndetit mendor.
Në redaksinë e “Iconstyle.al” ka ardhur një denoncim për të riun famkeq.
Një vajzë, emrin e të cilës për arsye konfidencialiteti nuk do ta përmendim, ka dërguar historinë e saj ku përshkruan një rast gati-gati identik me incidentin e djeshëm, që përfshin sërish Denisin “e tmerrshëm”.
“Hey shpresoj të jeni mirë. E njëjta gjë më ndodhi dhe mua njësoj si dhe vajzave, më shtyu dhe pastaj filloi të më gjuante vetëm me grushta deri sa për pak humba ndjenjat, fatmirshisht nuk isha vetëm.
Nga gjendja e rënduar nuk po e besoja çfarë ndodhi në fillim dhe me pas fillova të ndjeja dhimbje në kokë dhe në vesh. Telefonova të fejuarin tim. Ai sapo ishte kthyer nga jashtë; bashkë me te ika në spital në urgjencë dhe aty më thanë se njëra nga daullet e veshit ishte çarë, ndërsa tjetra ishte dëmtuar.
Kisha dhimbje të tmerrshme por mora forcën dhe ika në komisariat bëra denoncimin dhe po atë ditë në darkë më vjen fotoja e djalit në ‘whatsapp’ nga një punonjëse e policisë për konfirmim nëse ishte ky personi që më dhunoi apo jo? E komfirmova që ishte ai manjak dhe ndërkohë i fejuari kërkonte të bënte vetgjyqësi por mori si ‘kërcënim’ nga policia se nëse ai do përfshihej në këtë çështje do i digjeshin dhe letrat e huaja qe kishte në komisari.
Është diçka që më ka lënë traum, edhe sot kur e kujtoj. Shpresoj që mos të dhunoj më bija nënash të pafajshme që ecin në rrugën e tyre; në qetësinë apo hallet e tyre.”
Urojmë vetëm që autoritetet të jenë ndërgjegjësuar duke marrë masa më serioze ndaj Denisit dhe njerëzve si Denisi.
