Kremlini ka vendosur të legalizojë piraterinë kompjuterike. Nuk do të ketë asnjë ndëshkim për shkarkimin e paligjshëm të muzikës, filmave, serialeve televizive ose video-lojërave në Rusi.
Lajmi bëhet i ditur nga gazeta ruse “Gazeta”, sipas të cilës ish-deputeti i Dumës, Dmitry Ionin, i kishte këshilluar qytetarët që të përdorin “RuTracker”, pra gjurmuesin më të madh rus “BitTorrent”, për të piratuar dhe parë filma e Hollywood-it.
Pak ditë më parë, ministri rus i Zhvillimit Ekonomik, Maksim Rešetnikov, kishte hequr rregullat për pronësinë intelektuale, duke zbatuar një ligj që parashikon veprime të tilla në raste ekstreme urgjente, për të garantuar mbrojtjen dhe sigurinë e shtetit.
Prandaj, nga sot, shtetasit rusë lejohen të përdorin piraterinë, për të përfituar nga muzika, filmat dhe video-lojërat, përderisa këto janë prodhuar nga vende që kanë sanksionuar dhe kundërshtuar Rusinë.
Është e qartë se e gjithë kjo është bërë për të kundërshtuar dhe dëmtuar të gjitha ato kompani që kanë vendosur të largohen nga tregu rus, si Apple, Microsoft, Netflix apo Sony.
Edhe në botën e muzikës ka pasur shumë braktisje: Spotify nuk është më në dispozicion dhe disa kompani diskografike, si Universal, kanë vendosur të mos kenë më asgjë me Rusinë.
Këtë zgjedhje e ndajnë edhe shumë artistë, si Pink Floyd, të cilët kanë bërë të padisponueshme një pjesë të madhe të diskografisë së tyre.
