Novak Djokovic, tenisti i rangut më të lartë për meshkuj, i cili është gjithashtu shumë skeptik për vaksinimin ndaj koronavirusit, do të luajë në “Australian Open” më vonë këtë muaj, pasi ka marrë një përjashtim të veçantë nga kërkesat për Covid-19.
“Unë do të shkoj me një leje përjashtimi. Le të shkojmë në 2022!” – ka njoftuar Djokovic të martën në disa platforma të mediave sociale.
Kampioni në fuqi i turneut postoi një foto ku shihet duke buzëqeshur, pranë bagazhit të tij. Por disa nga reagimet kryesore ndaj postimit të tij në “Twitter” nuk ishin të lumtura
“Lajmi sapo ka dalë këtu në Melburn. Ne e kemi patur të vështirë këtu kohët e fundit dhe njerëzit e zakonshëm mendojnë se ky vendim është një shaka. Ai nuk e ka idenë se për çfarë është në punë.”- ka shkruar një komentues.
“Ai u tregua një shembull i gabuar për të gjithë. Virusi po rrezikon mijëra jetë njerëzish, ndërkohë që ai do të shkojë i pavaksinuar. Ai duhet të mbajë përgjegjësi për veprimet e tij, duke e ditur se sa shumë njerëz e ndjekin dhe admirojnë.”
Victoria, shteti ku luhet turneu, aktualisht ka 48,297 raste aktive me COVID-19, sipas informacioneve më të fundit nga “Departamenti i Shëndetësisë Viktoriane”. Programi i vaksinimit i shtetit ka qenë shumë efektiv: 94.5% e banorëve të moshës 12 vjeç e lart kanë marrë të paktën një dozë vaksine dhe afërsisht 93% kanë marrë dy doza.
Djokovic ka refuzuar më parë të sqarojë nëse ai është vaksinuar. Në vend të kësaj, ai ka folur për rëndësinë e zgjedhjes së lirë. Por ai shfaqi skepticizmin e tij për vaksinën COVID-19 që herët, duke thënë në prill të 2021 se “nuk do të doja të detyrohesha nga dikush që të merrte një vaksinë në mënyrë që të mund të udhëtoja”.
