Apple (+30%)
- Vlera e tregut në fillim të vitit: 2.2 trilion dollarë
- Vlera e tregut deri më 23 dhjetor: 2.9 trilion dollarë
Pavarësisht problemeve të panumërta me zinxhirët e furnizimit që kanë penguar prodhimin e produkteve kryesore si iPhone, pavarësisht se kompania e ka kaluar kufirin e 2 trilion dollarëve pak kohë më parë, në gusht të vitit 2020, Apple vazhdoi një marshim të qëndrueshëm përgjatë vitit 2021 drejt arritjes së vlerës të tregut prej 3 trilion dollarë. Rritja prej 30% e vlerës së aksioneve këtë vit shtoi 659.8 miliardë dollarë në vlerën e saj të tregut. Apple vazhdon të jetë kompania më e vlerësuar në botë, me rreth 400 miliardë dollarë.
Microsoft (+50%)
- Vlera e tregut në fillim të vitit: 1.7 trilion dollarë
- Vlera e tregut deri më 23 dhjetor: 2.5 trilion dollarë
Kompania e teknologjisë e themeluar nga Bill Gates ka pasur shumë sukses vitet e fundit pasi ka rritur fokusin e saj në teknologjinë cloud. Vetëm në vitin 2021, aksionet e Microsoft u rritën me plot 50%.
Vlera e tregut e kompanisë kaloi pragun e 2 trilion dollarëve për herë të parë në muajin qershor dhe po kërcënon të kalojë Apple për t’u bërë kompania e parë me një vlerë prej 3 trilion dollarë.
Alphabet (+65%)
- Vlera e tregut në fillim të vitit: 1.2 trilion dollarë
- Vlera e tregut deri më 23 dhjetor: 2 trilion dollarë
Kompania mëmë e Google arriti vlerën e 2 trilion dollarëve në fillim të nëntorit, më pak se dy vite pasi kaloi shifrën 1 trilion dollarë në janar të vitit 2020. Vlera e aksioneve u rrit me 65% këtë vit, ndërsa Alphabet raportoi një rritje prej 43% në të ardhurat nga reklamat në raportin e fundit të fitimeve dhe tejkaloi vlerësimet e analistëve për fitimin e saj.
Amazon (+6%)
- Vlera e tregut në fillim të vitit: 1.6 trilion dollarë
- Vlera e tregut deri më 23 dhjetor: 1.7 trilion dollarë
Vlera e aksioneve të Amazon ka qenë në rritje përgjatë vitit 2021, duke u shtuar me plot 17% këtë verë krahasuar me fillimin e vitit, përpara se kjo shifër të arrinte një vlerë më modeste prej 6%. Pavarësisht se kompania po përballet me ngadalësimin e rritjes së shitjeve tani që blerësit po kthehen në dyqane dhe problemet me zinxhirët e furnizimit po kufizojnë disponueshmërinë e disa artikujve, Amazon gjithsesi raportoi 110.8 miliardë dollarë të ardhura në tremujorin e kaluar. Gjatë tremujorit të fundit, të ardhurat e Amazon nga shërbimet në web (Amazon Web Services), reklamat dhe abonimet Prime tejkaluan për herë të parë shitjet me pakicë.
Tesla (+58%)
- Vlera e tregut në fillim të vitit: 677.4 miliardë dollarë
- Vlera e tregut deri më 23 dhjetor: 1.1 trilion dollarë
Tesla vazhdoi përgjatë vitit 2021 performancën e saj mahnitëse të rritjes së vlerës të aksioneve që pati gjatë vitit 2020, në të cilin aksionet e saj u rritën më shumë se pesë herë, duke e bërë kështu Teslan një nga emrat më të njohur në Wall Street dhe CEO-n e saj Elon Musk njeriun më të pasur në botë. Vlera e aksioneve u rrit me 46% këtë vit, ndërsa Tesla tejkaloi për herë të parë pragun e tregut prej 1 trilion dollarësh.
Për ta vënë në kontekst, Tesla e kaloi kompaninë Toyota, prodhuesin e dytë tashmë më të vlerësuar të automjeteve në botë, në korrik të vitit 2020, kur ajo kishte një vlerë relativisht të vogël prej 206 miliardë dollarë.
Meta (+20%)
- Vlera e tregut në fillim të vitit: 778.2 miliardë dollarë
- Vlera e tregut deri më 23 dhjetor: 932.6 miliardë dollarë
Megjithëse në shifra më të ulëta, Facebook ia doli gjithashtu të bëhej pjesë e grupit të kompanive me vlerë 1 trilion dollarë gjatë këtij viti. Ky vit me trazira për kompaninë – duke përfshirë edhe daljen në publik të dhjetëra mijëra dokumenteve të brendshme – nuk e pengoi rritjen e çmimit të aksioneve.
“Pavarësisht zhurmës, fitimet që gjeneron Facebook përmes miliarda përdoruesve të tij vazhdojnë të rriten me një ritëm të shpejtë,” tha Ives. Kompania aktualisht është duke u fokusuar në përmirësimin e opsionit të saj Reels, i cili konkurron drejtpërdrejt me TikTok.
