Ndërsa i afrohemi fundit të vitit 2021, është koha për të reflektuar për tronditjen e fortë që pandemia i dha botës së biznesit. Disa liderë po pranojnë ndryshimin, të frymëzuar për të rritur bizneset e tyre në një mënyrë të re.
Të tjerë po detyrohen të futen në një mënyrë tjetër të menduari dhe të vepruari, duke shpresuar dëshpërimisht se gjërat do të kthehen në normalitet.
Nëse dëshironi të jeni një lider që i prin ndryshimit, ka ardhur koha për të përqafuar një mënyrë të re drejtimi. Është koha për të hequr dorë nga sistemi i vjetër dhe për të krijuar trende, kultura dhe kompani të reja.
- Krijimi i një kulture të mirëqenies
Sipas Qendrës për Kontrollin e Sëmundjeve, depresioni shkakton rreth 200 milionë ditë pune të humbura çdo vit dhe u kushton punëdhënësve diku midis 17 miliardë dhe 44 miliardë dollarë. Kjo është tronditëse.
Liderët e së ardhmes po i kushtojnë vëmendje këtij fakti. Ndërsa bëhemi gati për të filluar vitin 2022, ne duhet të krijojmë një kulturë ku mirëqenia e punonjësve është më e rëndësishmja. Ndryshimet e tilla fillojnë nga lart dhe liderët janë të parët që duhet të japin shembullin.
Çdo person në ekipin ekzekutiv të një kompanie duhet të jetë i përkushtuar për mirëqenien në vendin e punës, duke formuar një mënyrë jetese organike, ku prioritetet kryesore janë shëndeti fizik, emocional, mendor dhe shpirtëror. Ditët me vetëm punë, punë, punë duhet të mbarojnë. Njerëzit dëshirojnë më shumë ekuilibër dhe mirëqenie në jetët e tyre dhe liderët që e injorojnë ose i rezistojnë adresimit të kësaj çështje do të mbeten prapa.
- Investimi në zhvillimin e punonjësve tuaj
Një studim i publikuar në vitin 2013 nga studiues në Universitetin e Oksfordit vlerëson se rreth 50 për qind e të gjitha punëve në SHBA kishin një rrezik të lartë për t’u automatizuar gjatë dy dekadave të ardhshme. Nuk është çudi që ka kaq shumë frikë për sa i përket së ardhmes së punës. Ne nuk e kuptojmë se çfarë do të thotë kjo për karrierën dhe jetesën tonë. Fakti që nuk e dimë se si do të jenë punët në të ardhmen është shqetësues. Kjo është arsyeja pse liderët duhet të investojnë në rritjen e aftësive të punonjësve të tyre.
Liderët mund të fillojnë duke hartuar një program mësimi dhe zhvillimi të fokusuar te përvetësimi i teknologjive dhe softuerëve të rinj, duke avancuar njohuritë dhe aftësitë specifike të punës dhe duke mësuar teknikat efektive të menaxhimit dhe të lidershipit, përfshirë aftësitë e tilla si empatia, dëgjimi, zgjidhja e problemeve dhe komunikimi.
Programet efektive të përmirësimit të aftësive përfshijnë rotacionin e vendeve të punës – praktika e zhvendosjes së punonjësve në pozicione të ndryshme brenda kompanisë – duke shtuar detyra dhe përgjegjësi të reja në punën e një punonjësi. Së fundi, merrni në konsideratë investimin për aktivitetet trajnuese dhe të mentorimit të punonjësve.
- Trajtimi i pabarazisë brenda kulturës suaj
Sipas raportit të fundit të Gallup, “Burnout-i i punonjësve: Shkaqet dhe kurat”, 76 për qind e punonjësve përjetojnë burnout në punë të paktën ‘me raste’, ndërsa 28 për qind thonë se e përjetojnë atë ‘shumë shpesh’ ose ‘gjithmonë’ në vendin e punës. Dhe, cili është faktori kryesor që shkakton burnout? Trajtim i padrejtë në punë.
Drejtuesit kanë përgjegjësinë të sigurojnë që vendi i punës të jetë sa më i drejtë dhe i barabartë që të jetë e mundur. Nuk është e lehtë të dish se nga t’ia fillosh, por do të ishte mirë të fillohej me pagat. Përgatisni një vlerësim të plotë të kompensimit të punonjësve, duke e parë atë nga shumë këndvështrime, si për shembull: gjinia, pozicioni dhe hendeku midis punonjësve të thjeshtë, menaxherëve të nivelit të mesëm dhe drejtuesve ekzekutiv.
Më pas, përballuni me pabarazitë. Nuk ka asnjë arsye pse një CEO duhet të fitojë 350 herë më shumë se një punonjës i thjeshtë i kompanisë, ose që qëllimi i vetëm i kompanisë suaj të jetë maksimizimi i vlerës për aksionerët e saj. Këto janë disa nga arsyet pse ne e gjejmë veten në këtë situatë të pabarazisë marramendëse dhe të mosbesimit të thellë ndaj liderave tanë.
- Ndërtimi i infrastrukturës tuaj teknologjike
Në një postim të kohëve të fundit në blog për ndryshimin e horizontit kohor të teknologjisë, Seth Godin shkruan: “Dhjetë vite më parë, nëse do të ishit aq të mirë në përdorimin e rrjeteve dhe programeve kompjuterike sa jeni sot, shumica e kolegëve tuaj do t’ju konsideronin një lloj magjistari. Pyetja nuk është nëse secili prej nesh do të përmirësohet apo jo në përdorimin e mjeteve të teknologjisë, çështja e vetme është: sa shpejt do të ndodhë kjo?”
Nuk ka dyshim se e ardhmja është ndërtuar mbi teknologjinë dhe shumica dërrmuese e kompanive dhe qeverive nuk janë ende gati për atë që do të vijë në të ardhmen. Do të duhet të merren shumë vendime të vështira, të tilla si investimi në infrastrukturën e kompanisë suaj dhe jo në rritjen e saj. Por, çfarë dobie ka rritja nëse nuk është e qëndrueshme dhe nëse nuk jeni mjaftueshëm të shkathët për të ndryshuar kur të vijë kriza ose problematika e radhës?
- Pranimi i mendësisë së eksperimentuesit
Nuk ka dyshim se do të ndodhin shumë ndryshime; kjo është norma e re. Ajo që bëtë dje, ka shumë të ngjarë të mos funksionojë nesër. Po, mund të ndryshojë kaq shpejt, ashtu siç ndodhi në marsin e vitit 2020. Për të qenë gati për të ardhmen, duhet të jeni i gatshëm të provoni gjëra të reja, të eksperimentoni.
Mos kini frikë të provoni gjëra të reja. Në fakt, sa më shumë të mësoheni të përshtateni, të mësoni dhe të zhvilloheni, aq më mirë do të bëheni. Paqëndrueshmëria ekonomike do të jetë një faktor që do të ketë ndikimin e vet edhe për ca kohë, prandaj përqafimi i mentalitetit të një eksperimentuesi do t’ju ndihmojë të jeni një hap përpara të tjerëve.
Tani është koha për të pranuar këto trende të lidershipit. Ka kaq shumë mundësi për t’u shfrytëzuar në këto kohë ndryshimesh të madha. Jini të përgatitur për atë që do të vijë më pas dhe krijoni një organizatë që ndryshon jetën e punonjësve, të klientëve dhe të botës tuaj.
/ The Entrepreuner
