“Emily in Paris”, një ndër serialet më të pëlqyera nga publiku po përgatitet për një sezon të dytë.
Së fundmi është konfirmuar se komedia me protagoniste kryesore aktoren, Lily Collins zyrtarisht po rikthehet në muajin dhjetor.
Kjo u bë e ditur nga “Netflix” përmes një ‘traileri’, nga i cili zbuluan pak më shumë për atë që do të ndodhë në sezonin që pritet të vijë shumë shpejt.
Aventura e “Emily in Paris”, (Collins) e cila udhëton në Paris për të ndihmuar në ofrimin e një firme marketingu me një perspektivë amerikane vazhdon.
Sjellim në vëmendje se seriali është nominuar dy herë për “Golden Globes” dhe dy për “Emmy Awards” dhe po ashtu ka marrë reagime të ndryshme edhe nga shikuesit, të cilët mezi po presin seritë e reja.
“Sado zhgënjyese që është ndonjëherë të lexosh këto gjëra, është gjithashtu një dhuratë”, tha Collins, 32-vjeçe, më parë për revistën Vogue të Arabisë lidhur me kritikat që morën.
Bazuar në fjalët e krijuesit të serive Darren Star, pjesa e dytë do të jetë ‘më shumë për të gërmuar më thellë’ në personazhin e Collins dhe përvojat e saj. Sipas tij, sezoni i dytë është shumë më i bukur se i pari.
Sezoni i dytë i “Emily në Paris” pritet të publikohet në datën 22 dhjetor.
