Një dokumentar për jetën e Georgina Rodriguez do të shfaqet së shpejti në “Netflix”.
Partnerja e Cristiano Ronaldo-s punonte si shitëse në një dyqan të rrobave “Gucci” në Madrid, ku aty një ditë u shfaq Ronaldo si klient. Ky ishte dhe takimi i tyre i parë. Nga një vajzë që fitonte 10 euro në orë, jeta e Georgina-s ndryshoi totalisht.
Një drejtues i “Netflix”, Alvaro Diaz, ka treguar shkurtimisht momente nga xhirimi i dokumentarit.
“Georgina është krejtësisht e sinqertë. Në dokumentar pranon se jeta e saj ndryshoi nga të mos pasurit asgjë në absolutisht gjithçka. Ajo ishte e re, e zakonshme, jeta e së cilës ndryshoi në mënyrë drastike. Ajo po largohej nga puna një ditë dhe rruga iu kryqëzua me dashurinë e jetës së saj. Kush nuk e ka ëndërruar këtë”, thotë Diaz.
Në serinë e parë të këtij dokumentari, Georgina Rodriguez do të shfaqet duke thënë:
“Shumë njerëz e dinë emrin tim, por pak njerëz e dinë kush jam.
Unë jam 27 vjeç dhe jeta ime ndryshoi 5 vite më parë. Ditën kur takova Cristiano-n, ishte verë, ditë e enjte, dhe kur po dilja nga dyqani, u shfaq një burrë i pashëm gati 2 metra i gjatë”.
Po ashtu në këtë dokumentar do të shfaqet edhe Cristiano Ronaldo, që do të flasë për njohjen me dashurinë e tij. Mediat kanë zbuluar edhe fragmente nga rrëfimi i tij.
“Gjithçka ndodhi në sekonda. Nuk e kisha menduar ndonjëherë se do të ishin ndjenja kaq të mëdha sa të dashurohesha me të, nuk e prisja. Georgina është gruaja me të cilën jam krejtësisht i dashuruar”.
Ndërkohë, ende nuk është bërë e ditur një datë zyrtare për shfaqjen e dokumentarit.
