Leo Messi do të jetë lojtar i PSG dhe këtë gjë e kanë konfirmuar vetë francezët nëpërmjet njoftimeve në rrjetet sociale. 34-vjeçari do të nënshkruajë një kontratë dyvjeçare me opsionin e një të treti në PSG , ku do të ketë një pagë neto prej 35 milionë eurosh në vit.
Pa deklaruar në mënyrë zyrtare se Lionel Messi do të nënshkruajë për PSG, klubi francez ka postuar një video në mediat sociale duke lënë të kuptohet për afrimin e sulmuesit legjendar të Barcelonës.
Thuhet se Messi do të jetë pjesë e PSG deri në verën e vitit 2023, ndërkohë që ka klauzolë për zgjatjen e marrëveshjes edhe për një sezon tjetër.
Po ashtu edhe, Antonela, bashkëshortja e Lionel Mess-it, ka postuar një fotografi të saj me gjashtë herë fituesin e Topit të Artë në aeroplan ndërsa udhëtonin për në Paris.
“Të pestë ne po shkojmë së bashku për një aventurë të re,” lexohet krahas fotos, duke iu referuar vetes dhe Lionel-it, si dhe tre fëmijëve të tyre.
Si për të konfirmuar, Neymar ka postuar një imazh të tij dhe Mess-it duke u përqafuar gjatë kohës së tyre në Barcelonë me mbishkrimin:
“Kthehemi së bashku” përpara lëvizjes së argjentinasit në PSG.
Kujtojmë se para pak ditësh, Messi i dha lamtumirën e fundit skuadrës së Barcelonës, në të cilën nisi të luante që kur ishte ende shumë i ri. Në konferencën për shtyp ai nuk mundi t’i mbante dot lotët, teksa foli për eksperiencën e tij shumëvjeçare në këtë ekip.
“Barcelona është shtëpia jonë dhe kështu u premtova edhe fëmijëve të mi. Falenderoj të gjithë ata që na ndihmuan. Unë jam rritur me vlerat e kësaj shtëpie, duke e trajtuar veten me përulësi dhe respekt. Kështu veprova me të gjithë në këtë shtëpi dhe shpresoj që kjo të mbetet, përveç gjithçkaje që fitojmë. Kemi kaluar gjëra të vështira, por kjo na bëri të rritemi. Unë gjithmonë kam dhënë gjithçka për këtë klub, për këtë fanellë. Nga dita e parë në të fundit dhe jam më se i kënaqur. Faleminderit njerëzve për dashurinë e tyre përgjithmonë”, u shpreh Messi gjatë konferencës.
