Kampionet Olimpike, Distria Krasniqi dhe Nora Gjakova, janë rikthyer sot në Kosovë së bashku me Majlinda Kelmendin dhe trajnerin Driton Kuka. Ata janë pritur nga kryeministri i Kosovës Albin Kurti dhe presidentja Vjosa Osmani.
Distria Krasniqi, që i siguroi një nga medaljet e arta Kosovës, u shpreh se nga Lojërat Olimpike të Parisit shpreson të kthehet me më shumë medalje, teksa i falenderoi të gjithë për mbështetjen e madhe.
‘’Jam mirënjohëse për këtë pritje kaq të ngrohtë. Ju kisha falenderu gjithve, sidomos popullit shqiptar qe na ka mbështet vazhdimisht. Shpresojmë që s’kemi me mbet vetëm me këto tri medalje, por nga Parisi shpresojmë me u kthy me ma shumë”, tha Distria Krasniqi.
Ndërsa trajneri Driton Kuka falendeori fillimisht Majlinda Kelmendin, që ishte e para që fitoi një medalje olimpike për Kosovën në “Rio 2016”. Kuka u shpreh i bindur se nuk do të vonojë dita kur edhe dy medalje të tjera do të fitohen, për të plotësuar kështu 5, aq sa rrathët olimpikë. Ai tha se është i sigurt se edhe sportet e tjera në Kosovë së shpejti do të jenë në lartësinë e xhudos.
“Dua të falënderoj në radhë të parë heroinën tonë Majlindën që i ka pri këtij ekipi, sepse në vitin 2016 ajo e nisi në mënyrë brilante dhe krejt bota u ngrit në këmbë qysh një Kosovë e vogël me prodhu një kampione olimpike. Tash i kemi tri.
Sinqerisht në gjithë këto urime dhe gëzim tonin që e kemi pasë për këto rezultate të arritura një koment më ka mbetur në kujtesë, sepse e kemi bërë një foto të pesë rrathët olimpikë dhe e kanë shkruar që duhet me i fitu edhe dy medalje. Unë si trajner po besoj që do t’i fitojmë edhe këto dy medalje që të bëhen pesë – aq sa janë rrathët olimpikë – në mënyrë që pas meje të vijë Majlinda, Akili dhe të tjerët në sportin e xhudos. Presim edhe jam i sigurt se edhe sportet e tjera së shpejti do të arrijnë ku kanë arritur xhudistët”, tha Kuka.
Kujtojmë se dhe Nora Gjakova, po ashtu xhudiste fitoi një medalje të artë për Kosovën në lojërat olimpike “Tokyo 2020”.
