Organizata Rinore ‘Guxo’ ka depozituar padi në SPAK për Partinë Socialiste pak muaj pas zgjedhjeve për çështjen e patronazhistëve. 162 qytetarë të Qarkut të Tiranës, përfaqësuar nga organizata rinore GUXO, padisin në SPAK Partinë Socialiste dhe drejtuesit e saj për mbledhjen, përpunimin dhe përhapjen e paligjshme tek patronazhistët të dhënave të tyre personale. Depozitimi i padisë u bënë orën 13:30, në SPAK.
Avokati Arlind Ahmetaj tha se kërkesa e 162 personave është dënimi i përgjegjësve, fshirja e të dhënave personale nga çdo server dhe të dëmshpërblehen. “Ne kërkojmë dënimin e personave përgjegjës, fshirja e të dhënave nga serverat privatë ose publikë dhe dëmshpërblimin e 162 paditësve. Ky është akti i parë ligjor. Kërkesa është e detajuar. SPAK ka përgjegjësi për të marrë dhe për të hetuar të gjitha rastet e shkeljeve të zyrtarëve të lartë shtetërorë”, tha Arlind Ahmetaj, avokat i qendrës.
Ndërsa më datë 19 prill, ishte presidenti i republikës, Ilir Meta, ai që iu drejtua SPAK-ut me 11 pyetje në lidhje me çështjen e patronazhistëve. “I kërkoj SPAK të nisë urgjentisht verifikimet, duke nisur nga kryeministri në detyrë Rama, dhe drejtuesit të Agjencisë Kombëtare të Shoqërisë së Informacionit.”- tha asokohe presidenti Meta, por nuk pati asnjë nisje të hetimeve në lidhje me këtë çështje. Zhvillime të tjera priten pas padisë së organizatës rinore “Guxo”.
