Shqipëria vazhdon të ketë çmime shumë të larta të karburanteve, duke rënduar akoma më tepër xhepat e qytetarëve. Pas përfundimit të karantinës çmimet e karburanteve janë rritur javë pas jave, për të mos pasur një rritje të menjëherëshme, por gjithsesi kjo i ka shqetësuar të gjithë përdoruesit e mjeteve.
Para dsia ditësh u njoftua se në vendin tonë çmimin i naftës është rritur për të katërtën herë radhazi, që nga momenti që dolëm nga karantina. Nisur nga kjo rritje drastike e çmimit të karburanteve, qytetarët kanë vendosur të ngrihen në një protestë. Ata kanë kërkuar që në shenjë proteste ditën e nesërme të fiken të gjitha makinat nga ora 12:00 deri në orën 15:00 me qëllim uljen e çmimit të karburanteve.
Në muajin qershor në pikat e tregtimit të operatorëve kryesorë në vend, nafta dhe benzina u shiten me 5 lekë më shtrenjtë. Në krahasim me nivelin e ulët prej rreth 148 lekësh, që arritën gjatë periudhës së pandemisë, nafta në vend është shtrenjtuar në pesë muaj, me 18 lekë për litër, ose me 12%.
Shtrenjtimi i parë u shënua në shkurt 2021, me 6-8 lekë për litër, i dyti në maj me 5 lekë për litër, dhe po me kaq edhe në fund të qershorit.
Me fillimin e pandemisë në mars të vitit të kaluar, çmimet e naftës në vend ranë me shpejtësi, nga mbi 180 lekë, që ishin në shkurt, zbritën poshtë 150 lekëve (midis 144-148 lekë) deri në janar 2021, duke reflektuar ecurinë e çmimeve të karburanteve në tregjet ndërkombëtare.
Operatorët e tregut pohojnë se tendenca e fundit rritëse lidhet me shtrenjtimin e karburanteve në tregjet ndërkombëtare. Sipas indeksit global të çmimit të naftës, Shqipëria renditet në vendin e 17-të në botë për çmimin më të lartë, duke lënë pas Gjermaninë, Greqinë, Serbinë dhe vendet e tjera të rajonit.
