Ditën e sotme Ministria e Shëndetësisë në Kosovë ka konfirmuar 2 rastet e para me variantin Delta nga Covid-19. Në deklaratën e ministrisë thuhet se ishin nisur për analizë në Berlin 22 mostra të dyshuara dhe vetëm 2 prej tyre rezultuan pozitive. Këto dy raste kanë shfaqur simptoma, por tashmë janë shëruar dhe gjenden në shtëpi, kësisoj izolimi i tyre ka përfunduar.
“Sot kemi pranuar të dhënat nga 22 mostrat pozitive të dërguara në Institutin e Virologjisë të Klinikës Unversitare Charite në Berlin, prej të cilave janë identifikuar 2 (dy) mostra me variantin Delta (B.1.617.2) të SARS-CoV-2. Të dy rastet kanë shfaqur simptoma, mirëpo tashmë janë shëruar dhe gjenden në shtëpi. Izolimi i tyre ka përfunduar. Ekipet e Institut Kombëtar të Shëndetit Publik, tashmë kanë gjurmuar të gjitha burimet dhe kontaktet e mundshme për të parandaluar përhapjen e mëtutjeshme të rasteve”, njofton MSH
Varianti Delta u detektua për herë të parë në Indi në dhjetor të vitit 2020, i cili sot është njëri prej varianteve më të rrezikshëm të Covid-19. Kërkimet e deritanishme tregojnë se mund të jetë varianti që përhapet më shpejt edhe më ngjitës sesa Alpha (U.K/B.1.1.7).
Më herët, Drejtuesi i Përgjithshëm i Organizatës Botërore të Shëndetësisë, Adhanom Ghebreyesus, është shprehur se është i shqetësuar për përhapjen e variantit Delta të koronavirusit. Në një konferencë për shtyp, Ghebreyesus tha se ky variant i virusit që është më i transmetueshmi i identifikuar deri më tani, është identifikuar në të paktën 85 shtete.
Sipas tij, variante të reja mund të shfaqen në ditët në vijim, pasi kjo është ajo që viruset bëjnë, pra ato evoluojnë. Kreu i OBSH theksoi se lindja e mutacioneve mund të parandalohet, gjithmonë nëse parandalohet transmetimi.
