Mëngjesi i të dielës rezultoi fatal për katër personat në Velipojë, që ndërruan jetë pas një sherri banal dhe përplasjes me armë zjarri.
Kujtim Ferracaku 59-vjeç, Xhovani Gocaj 25-vjeç, Edmond Gocaj 38-vjeç dhe Musaen Zeneli vetëm 20 vjeç mbeten të vdekur në vend pas përplasjes me armë të pronarëve të dy hoteleve. Akoma më tragjik ishte fati i 20-vjeçarit që humbi jetën, i cili sapo kishte filluar punën si kamarier në hotelin Gocaj. Dita e parë e tij e punës ishte fatale dhe rezultoi të ishte dhe dita e fundit e jetës.
Të afërm të 20-vjeçarit kanë pranuar se e ëma nuk kishte asnjë mundësi financiare për të mbuluar të paktën shpenzimet e funeralit të djalit të saj, që u nda nga jeta në lule të rinisë.
I kontaktuar nga “Iconstyle.al”, reperi Capital T pranoi se do të mbulonte të gjitha shpenzimet e funeralit të të ndjerit, për t’i ardhur në ndimë familjes së tij. (Lexo këtu)
Pas kësaj ngjarjeje tragjike, të tjerë persona janë ofruar të ndihmojnë nënën dhe vëllain e Musaenit të ndjerë, të cilët jetonin vetëm me të ardhurat e djalit që ndërroi jetë.
Jo vetëm persona të thjeshtë janë ofruar për të kontribuar në rrjete sociale duke kërkuar një numër llogarie, por edhe kompani të mëdha. Fondacioni “Fundjavë Ndryshe” ka dhuruar 3000 euro për familjen e Musaen Zenelit, ndërsa grupi Eurosig-Insig & UBA Bank i kanë akorduar nënës së djalit një ndihmë financiare prej 300,000 lekësh të reja.
“Iconstyle.al” ka komunikuar me familjarët e 20-vjeçarit që ndërroi jetë dhe ka siguruar numrin e llogarisë bankare të nënës së tij, për të gjithë ata që duan të kontribuojnë për familjen Zeneli.
Emri i llogarisë: ZENELI ANILA MENDUH
IBAN: AL16 2121 1009 0000 0000 0063 8423
