Çfarë mendoni se janë refugjatët?! Epo këngëtarja kosovare Rita Ora, e ka një përgjigje për ju që nuk e dini.
Në kuadër të një fushate për ndihmë ndaj refugjatëve në mbarë botën, Rita Ora si një refugjate e ikur nga Kosova bashkë me familjen, ka rrëfyer eksperiencën e saj dhe të familjes.
Në videon e shpërndarë në “Instagram” Rita tregon se kur ishte një vjeç, ajo dhe familja e saj u larguan nga vendlindja, Prishtina në prag të luftës dhe shkuan në Britani.
Ajo tregon se si prindërit e saj kanë punuar dhe familja e saj tashmë ka arritur të ketë biznese. “Unë jam refugjate”, thotë me krenari Rita.
Rita kurrë nuk e ka mohuar eksperiencën e saj dhe shumë shpesh nëpër emisione të ndryshme ka rrëfyer se si nga situata e pa përshtatshme në Kosovë ata janë detyruar të ikin jashtë vendit.
