Që në orën 07:00 të ditës së sotme ka nisur procesi i votimit për zgjedhjet parlamentare në të gjithë Shqipërinë.
Teksa qytetarët në të gjithë vendin janë drejtuar në qendrat e votimit për të dhënë votën e tyre, vëmendjen e ka tërhequr një çift nga Durrësi.
Në ditën e tyre të shënuar, nusja dhe dhëndri kanë shkuar të japin votën e tyre dhe ky moment nuk i ka shpëtuar vëmendjes së mediave.
Madje, nusja është shfaqur e veshur me fustanin e bardhë të nusërisë, teksa ka shkrepur një foto duke futur fletën e votës së saj në kuti, për ta pasur kujtim gjatë gjithë jetës së saj.
Tre orë pas nisjes së procesit të votimit, Kreu i KQZ-së, Ilirjan Celibashi raportoi se situata ishte e qetë dhe ishin konstatuar vetëm shumë pak problematika teknike. Me një postim në Twitter, Celibash i bëri thirrje kandidatëve për deputetë e në veçanti udhëheqësve politikë dhe drejtuesve të institucioneve kryesore të shtetit që të demonstrojnë qetësi dhe maturi në komunikimet publike.
“Situata e votimit është e qetë & me shumë pak problematikë teknike. Ftoj kandidatët për deputet, e në veçanti udhëheqësve politik & drejtuesve të institucioneve kryesore të shtetit të demonstrojnë qetësi, durim & maturi në komunikimet publike & kështu ti adresohen mbështetësve”, shkroi Celibashi.
