Seriali i famshëm i viteve 2005-2014, “How I met your mother”, është seriali i preferuar i shumë të rinjve të asaj kohe dhe jo vetëm, që kanë mësuar historinë e arkitektit “Ted Mosby” se si u njoh me mamanë e fëmijëve të tij.
Teksa rrëfen ngjarjen e rëndësishme të jetës së tij, në histori përfshihen miqtë e Ted, Barney, Robin, Lily dhe Marshall.
Historia e rrëfyer për fëmijët e tij zgjatet e stërzgjatet për nëntë sezone, duke i mbajtur shikuesit gjithmonë kuriozë para ekranit.
Pas suksesit të jashtëzakonshëm, ky show po rikthehet i përpunuar për kohët në të cilat jetojmë. Tashmë, po vjen versioni i ri “How I met your father” dhe gjejeni pak kush do të jetë në rol kryesor? Aktorja Hilary Duff.
Tashmë, ajo do t’i tregojë fëmijëve të saj si e njohu babain e tyre, në kohët e teknologjisë e rrjeteve sociale.
Hilary, që do të shërbejë gjithashtu si producente, do të luajë rolin e Sophie-s.
“Në këtë histori, Sophie dhe grupi i saj i ngushtë i miqve janë në mes të gjetjes se kush janë ata, çfarë duan nga jeta dhe si të bien në dashuri, në epokën e aplikacioneve të takimeve dhe opsioneve të pakufizuara”, tha në një njoftim për shtyp Ashley Barrett Hulu.
Kujtojmë se para pak kohësh, Hilary Duff, është bërë nënë për herë të tretë.
Aktorja publikoi në llogarinë e saj në Instagram një foto nga vaska ku ka sjellë në jetë bebushen, ndërsa brenda në vaskë me të qëndron edhe e bija Banks Violet Bair.
Pranë tyre janë sigurisht edhe partneri, Mattheë Koma, si dhe djali 8-vjeçar, Luca Cruz Comrie. Duff ka zbuluar për ndjekësit edhe emrin e vajzës që ka sjellë në jetë. Ajo quhet Mae James Bair.
“Mae James Bair – të duam bukuri. 24 mars 2021,” ka shkruar Hilary krahas postimit të bukur.
