Para disa ditësh Presidenti Ilir Meta dekoroi me titullin “Kalorësi i Urdhërit të Flamurit” Mehdi Bushatin si ish-futbollist. Mirëpo ky vendim ka shkaktuar reagime të ashpra nga ish të përndjekurit dhe familjarët e tyre, të cilët kanë treguar se Mehdi Bushati ka qenë në fakt një prej hetuesve më të dhunshëm të regjimit komunist. Njëra prej tyre që doli kundër dekorimit me titull është edhe gazetarja dhe aktorja, Megi Pojani. Kjo e fundit së bashku me motrat e saj prej ditësh ka hapur një peticion, që t’i kërkojnë presidentit Meta heqjen e titullit për Mehdi Bushatin.
E ftuar së fundmi në emisionin “Kafe Shqeto” në “Syri Tv”, Megi ka rrëfyer se personi në fjalë ka torturuar në mënyrë çnjerëzore burrat e familjes së saj gjatë vuajtjes së dënimit si të përndjekur. Ajo ka treguar se gjyshi i saj vazhdon ende të ketë shenja nëpër trup për shkak të dhunës së ushtruar asokohe nga Bushati.
“Gjyshi dhe xhaxhai im kanë pasur kontakte të drejtpërdrejta me Mehdi Bushatin dhe ai ka qenë dy herë hetues për gjyshin tim. Dhe ai është një sadist, përbindësh, gjakpirës, përfitonte dhe ndjente kënaqësi duke sulmuar djem të rinj dhe të pafajshëm, gjyshi im ka pasur akoma shenja në trup nga dhuna që i ka ushtruar Mehdi Bushati. Xhaxhai im ka qenë një nga iniciatorët e revoltës së Spaçit dhe ka pas një tjetër histori të frikshme me Mehdi Bushatin”, tha Megi për “Kafe Shqeto”.
Ajo lexoi dhe disa rreshta nga rrëfimi i xhaxhait të saj teksa tregonte se Mehdi Bushati e kishte kafshuar dhe torturuar. Në peticionin e hapur online deri më tani janë mbledhur më shumë se 12 mijë nënshkrime nga persona që kërkojnë që Presidenti Ilir Meta të tërheqë mbrapsht dekorimin për Mehdi Bushatin.
Më shumë se për kontributin në sport, ky i fundit është i njohur gjerësisht për krimet makabre gjatë regjimit komunist dhe këtu mund të lexoni një nga rrëfimet rrëqethëse të një prej të persekutuarve që ka vujatur në kurriz torturat çnjerëzore të Bushatit.
