Reperi i njohur, DMX ka përfunduar në spital pasi ka pësuar të premten infrakt dhe vijon të jetë i intubuar, raportoi avokati i tij Murray Richman, për CNN.
Mediat e huaja aludojnë se kjo gjendje e rënduar shëndetësore e reperit ka ardhur si pasojë e një mbidoze me lëndë narkotike, ndonëse ende nuk është konfirmuar shkaku i atakut në zemër.
Avokati i tij, tha se ka qenë në kontakte gjatë gjithë ditës së shtunë me familjarët e reperit, dhe fëmijët e tij, të cilët janë të shpërndarë në disa shtete amerikane, po kthehen për të qëndruar pranë babait të tyre në këtë moment delikat për jetën.
Richman tha se ai e njeh DMX për 25 vjet dhe tregoi se është në dijeni të diagnozës mjekësore të reperit, por nuk pranoi ta komentojë atë.
DMX, emri i vërtetë i të cilit është Earl Simmons, u fut në skenën e repit amerikan në vitet 1990, me këngë si “Party Up” dhe “Get At Me Dog”. 50-vjeçari gjithashtu ka luajtur edhe në mbi 40 filma, më të famshmit “Romeo Must Die” me këngëtaren e famshme Aaliyah pak para se ajo të ndërronte jetë, dhe “Never Die Alone”.
Reperi ka marrë tre nominime ”Grammy” , në vitin 2000 dhe 2001. Dy ishin për Performancën më të mirë “Rap Solo” dhe e treta ishte për Rap-in më të mirë.
